MP leh MLA-in DoNER Secretary an kawm Pawisa pe chhuak thuai turin an ngen

Rajya Sabha MP K Vanlalvena leh Human Resources Development Board vice chairman Dr L Thangmawia, MLA-te chuan November 21, Thawhlehni tlaiah khan New Delhi-ah DONER secretary Chanchal Kumar chu a pisaah an kawm a; sorkar laipuiin sum sanction order a tihchhuah tawh, a taka pawisa pek la ni si lo chungchang an sawipui.

MP leh MLA hian DoNER Secretary hnenah hian sorkar laipuiin sum sanction order a tihchhuah tawh, a taka pawisa pek si loh - Aizawl by pass road PM Devine scheme harsatna tawh te leh Tuichangral kawngpui ṭhenkhat laihna tur NESID Scheme harsatna ṭhenkhat bakah, Lengteng biala thil pawimawh ṭhenkhatte an thlen.

DONER Secretary chuan a rang thei ang bera bawhzui sak a tum thu K Vanlalvena leh Dr L Thangmawia a lo hrilh niin sorkar thuchhuahin a tarlang.

Lengteng bialtu MLA Dr L Thangmawia hian nimin khan New Delhi-a NHIDCL Headquaters pisaah NHIDCL hotute a kawm a, a bial tana kawngpui pawimawh hrang hrang hmalaknate a sawipui.

Sorkar thuchhuah tarlan danin, Dr L Thangmawia chuan NHIDCL general manager (technical) M Khalid, Mizoram lam bialtu a kawm a; sorkar policy anga KMMTP kawng leh Myanmar-a Sittwe lawng chawlhna chu thil pawimawh a nih thu sawiin, a rang thei ang bera tihlawhtling turin a ngen. NHIDCL General Manager chuan theihtawp chhuaha a lo bawhzui nghal tur thu a lo hrilh.

L Thangmawia chuan, a bial chhunga Mimbung bul, Tuivai lui aṭanga Defence Road siam thar tur chungchang pawh a zawtfiah nghal a; NHIDCL hotute chuan Defence Road hi Lengteng bial Tuivai aṭanga inṭanin, Myanmar ramri hrut phei zelin Zorinpuiah a tawp dawn tih an lo a, a project hmingah Indo-Myanmar Border Road (IMBR) an vuah thu leh km. 780-a thui tur a nih thu te, kum 2024 March thlaah detail project report (DPR) an peih hman tur thu leh Tuivai lei dawh pawh DPR-ah an lo telh tur thu MLA hi an lo hrilh a ni.

NHIDCL hotute chuan tun aṭanga kum hnih chhungin Mizoramah inkalpawhna kawng ṭha tak siam zawh hman ngei an tum thu an lo hrilh bawk.