KHAWTHLIR

Ruihhlo thatlohzia inzirtir

Assam Rifles chuan November 21, Thawhlehni khan Champhai district-a Thekte Primary School-ah ruihhlo, damdawi hman sual ṭhat lohzia leh a nghawngte inzirtirna hun an buatsaih a, zirlai leh zirtirtute an tel. Sipaia ṭan theih dan leh sipaia ṭan ṭhatnate an hrilhfiah nghal bawk.

Jal Shakti Abhiyan campaign buatsaih

National Institute of Technology (NIT), Mizoram leh Ministry of Jal Shakti chuan tun hnai khan NIT, Mizoram hmunah Jal Shakti Abhiyan - Catch the Rain awareness nationwide campaign an buatsaih a; thupui chu 'Source sustainability for drinking water' tih a ni. He hunah hian NIT, Mizoram director Prof. S Sundar leh IIT Bombay Prof. TI Eldho ten thu an sawi a; zirlaite tan thupui behchhanin poster presentation, quiz intihsiak, thusawi leh slogan inphuahsiakte buatsaih a ni bawk.

Lawmman sem

Lungleia Synod Mission Centre conference hall-ah nimin khan State Designated Agency for Energy Conservation Electrical Inspectorate buatsaihin kawlphetha (electrical energy) renchem inzirtirna tura Lunglei district-a sikul thlan bik 20-a Energy Club dinte kharna neih a ni a; PE department hotute'n kawlpetha renchem dan te, mipui leh ramin a hlawkpui dan te an sawi. Energy Club tiṭha sikul 10, Energy Club member ti ṭha mi 13 leh essay inziahsiaka ti ṭha mi 13-te hnenah lawmman sem a ni.

Pa khawi dan zirna buatsaih

Ministry of DoNER hnuaia North Eastern Council project - 'Proposal of identified village for providing key identified services at Marpara 'S' Village of West Bunghmun RD block, Lunglei District' hnuaiah Bunghmun block development officer H Lalramenga chuan Marpara South Zonal TCA Hall-ah pâ khawi zirna a buatsaih a; Bunghmun khuaa mi 15 telin, KVK Hnahthiala mithiamte'n pa khawi tura thil pawimawh hrang hrang an zirtir.