Tleirawl rubotu leh pawngsualtu kum 20 chhung táng tura tih a ni

Kolasib District Court-a Fast Track Court chuan Mangtindam (28) s/o Lianthawngthang, Tahan, Myanmar, Kolasib district-a Khàmráng khuaa khawsa ṭhin chu hmeichhe tleirawl kum 14 mi tlan­bopui leh pawngsual thubuaiah kum 20 chhung táng tur leh Rs 10,000 chawi turin a hrem.

Kolasib Fast Track Court judge R Vanlalena chuan Mangtindam hi a thubuaiah November 22, Nilaini khan thiam loh a lo chantir tawh a; nimin khan hremna tur a puang leh a ni.

Court thutluknaa a lan danin, Mangtindam hi pawngsual thubuaiah kum 20 chhung táng tur leh Rs 5,000 chawi tura tih a ni a; pawisa a chawi loh chuan thla thum dang tàn belh tura tih a ni. Hmeichhia tlanbopui/rûkbo thubuaiah kum nga táng tur leh Rs 5,000 chawi tura tih a ni a, pawisa a chawi loh chuan thla thum dang tàn belh tura tih a ni bawk.

Kum tling lote chunga mipat hmeichhiatna kaih­hnawiha pawi khawihtu, court-in thiam loh a chantirte chu jail-a an tàn hun bituk pawhtawi (remission) theih a ni lo.

Court chuan Mang­tindam chungah zahngaihna lantirin, pawngsual thubuai leh inrûkbo thubuaia hremnate chu inchher chhuan (consecutive)-a kaltir loin, a rualin a kaltir (concurrent) a; pawisa chawi tur erawh a hranpa ve vea chawi tur niin, belhkhawmin Rs 10,000 a chawi a ngai dawn a ni.

Mangtindam hi jail-a táng mek a ni a, hremna tur puan lai hian court-ah hruai a ni. Court aṭangin Kolasib District Jail-ah dah luh leh nghal a ni.