CEO hoin vote chhiar dan tur sawiho

Chief electoral officer (CEO) Madhup Vyas chuan nimin khan Mizoram district 11-a district elec-tion officer (DEO)-te vote chhiar chungchanga inpuah-chahna kalpui tawh dan leh hmachhawpte video confe-rence kaltlangin a sawipui.

Madhup Vyas chuan, Election Commission of India (ECI) ruahman angin November 27, 2023-ah encore portal hmangin vote chhiar chhinna, full dress rehearsal neih tum a nih thu a sawi a; DEO-te chu harsatna a awm loh nan inruahman lâwk vek tur leh chawhnu dar 3-ah report kimchang pek hman vek tum tur te, inthlan vuakveta thil chhinchhiah tlak leh dangdai, entawn tlak nia ngaih an neihte November 30, 2023 ral hmain CEO pisaah thehlut hman turin a chah.

An district ṭheuha inthlanna official duty hnathawk ṭha, chawimawi tlâk nia an hriatte CEO pisaah ziaka thlen tura DEO-te chahin CEO chuan, "Vote chhiar hun bik atan ECI-in bial tin atan counting observer 40 a rawn ruat a, RO handbook-te ṭha takin râwn ṭhin ang che u," a ti.

DEO-te chuan vote chhiar tura inpuahchahna an kalpui dan tlangpui leh hmabak la awmte an sawi a; harsatna awm loa vote chhiar tura an inpuahchah mek thu leh zawh thuai an beisei thu an sawi.

Sawihonaah hian EVM, postal ballot leh ETPBS/ ETPBMS hmanga vote tla chhiar dan tur te, counting hall luh leh chhuah dan tura ruahmanna siam leh a hungna siam chungchang te, dâltu awm loa him taka strong room aṭanga counting hall-a EVM thiar dan tur te, vote chhiar nana dawhkan leh hmanraw mamawh dang ruahman dan turte sawiho a ni a; media centre mumal tak siam leh round tin result-te mipui hriat tura puanzar nghal zel dan turte tarlan a ni.