KHAWTHLIR

Hmeichhe Ni

Vawiin November 24 hi Kohhran Hmeichhe Ni vawi 27-na a ni a, Presbyterian Kohhran Hmeichhiate'n bial leh tualchhungah an remchan angin an hmang dawn. Kumina Kohhran Hmeichhe Ni thupui chu 'Kristian nu ṭha' tih a ni a, Synod secretary Upa B Lalhmunliana ziah a ni. Kohhran Hmeichhe Ni hi kum 1997 aṭangin hman a ni.

Pastor pension intawhkhawmna

Presbyterian Pastor Pension Fellowship (PPPF) chuan nimin khan Synod Conference Centre-ah intawhkhawm vawi 53-na an hmang. Chawhma inkhawm chu PPPF chairman Rev.Dr Zaihmingthanga'n kaihruaiin, PPPF finance secretary Rev. C Chawngliana'n 'Pension nun hman dan ṭha' tih thu a sawi a; chawhnu lam chu PPPF vice chairman Rev. C Rosiama'n kaihruaiin, thupui sawihona leh intihhlimna hun hman a ni.

Horti Exhibition

Horticulture department chuan nimin khan Lawngtlaia LADC Hall-ah Horti Exibition cum Horti Fair an buatsaih a, district bawrhsap Joseph H Lalramsanga'n a hawng. Exhibition cum Fair-ah hian thlai rah lam chi 15 leh pangpar chi riat pho chhuah a ni a, Lawngtlai KVK-a mithiamte'n endikin, lawmman siam a ni.

YMA-in in saksak

YMA, Dapchhuah Branch chhuan an khuaa chenna tur nei lo mi pakhat in an saksak. November 20, 2023 aṭangin Dapchhuah YMA hnuaia section hrang hrangte a inchhâwka hnatlangin in an sa a, nimin thleng khan thâ 130 chuang an sêng tawh a ni.

Energy club inelna

Lawngtlai district-a sikul thlan 20-a energy club dinte kawlphetha renchem inzirtirna lam hawi inelnaah Chawntlangpui Middle School Energy Club pakhatna an ni a; Chandmary Middle School leh Rosebud Middle School te chu pahnihna leh pathumna an ni. Energy club pakhatah zirlai 20 zel awmin, zirlai pakhatin in 10 zelah kawlphetha hman dan an enpui a, an hman tlem dan turte an hrilhfiah ṭhin a ni.