YMA Sub-Hqrs Lunglei kum 50 tlin lawm: "YMA hi pressure group a ni lo" - CYMA VP

YMA Sub-Headquarters, Lunglei chuan nimin khan Lunglei Convention Centre-ah an kum 50-na, golden jubilee an lawm a; khuallian Central YMA vice president Prof. Lalnuntluanga chuan, YMA chu pressure group a nih loh thu a sawi.

Jubilee lawmna hi Lunglei Sub-Hqrs. YMA vice president CMS Dawngliana'n a kaihruai a; CYMA Vice President chuan, YMA chu pressure group a nih loh thu sawiin, "Eng emaw vanga sorkar nawr chiam tur kan ni lo. YMA chu zâwldawh tak leh inngaitlawm tak a, a duh leh a thil tih tum tihlawhtling ṭhin a ni," a ti.

Prof. Lalnuntluanga chuan, YMA-a an inhman avangin mimal hlâwkna zawn a rem loh thu sawiin, "YMA-ah ni chu ni, ni lo chu ni lo tih nunpui tur a ni a, thu dik ṭan tlat tur," a ti a, thu dik ngainat kawnga ṭan la thei ber chu YMA member-te an nih thu a sawi.

CYMA Vice President chuan, ramin harsatna a tawh hrang hrangah YMA-in mawhphurhna lian tak a nei zel ta chu hruaitu hmasate inpekna vang a nih thu a sawi a, "YMA hi tute emaw kal khawmin an din satliah ni loin, missionary-te'n Pathian aṭanga pàwlna an dawn kaltlanga din, chunglam hriatpui a ni," a ti.

YMA chu politics rawng kai lo a nih thu sawiin Lalnuntluanga chuan, "Mizo Kristiante inpàwl khawmna atana din a ni a, a din chhan hi YMA member-te'n hriat chian a ngai," a ti a; YMA-ah mi tin, kohhran leh party zawng zawng lengin huapzo pawl a nihna chhawm nun a la ni zel em tih ngaihtuah turin YMA hruaitu kal khawmte a chah.

Lunglei Sub-Hqrs. YMA president K Lalfakzuala pawhin thu sawiin, Lunglei Sub-Hqrs. YMA kum 50 a tlin theihna tura thâ leh zung, sum leh pai bakah an thiamna hmang tawhtu zawng zawng zahna chibai a bûk a, "Hruaitu hmasate'n khawtlang tan leh ram leh hnam tan hna ṭangkai tam tak an thawk a, an inpekna vanga tun dinhmun thleng thei kan ni," a ti.

K Lalfakzuala hian ralkhat aṭangin Mualṭhuam dáia Lunglei Sub-Hqrts YMA golden jubilee lungphun a hawng a ni.