Zangnadawmna dawng tawh zinga in la ṭhiah lohte nawr chhiat tum

Serchhip Bawrhsap chuan thupek chhuahin, Serchhip district-a National Highway no. 54 kawngpui laih mek chhunga sorkarin ram a lakah zangnadawmna dawng tawh, in la ṭhiat lote lakah thubuai ziah luh a nih dawn thu leh an inte nawr chhiat a nih dawn thu a tarlang.

Sorkar thuchhuah tarlan danin, November 22, Nilaini khan Serchhip DC-in Chhingchhip leh Chhiahtlang khuaa NH-54 kawng laih mek a tlawh a, zangnadawmna dawng tawh zingah mahni in la ṭhiat duh lote chungchang ngaihtuahin a hmunah a enfiah a ni.

Zangnadawmna dawng tawh, in la chhuahsan duh lo leh la ṭhiat duh lote chu kar leh lamah an la chhuak lo zel a nih chuan IPC Section 188 tlawhchhanin thubuai siamsak an ni dawn a; an in pawh nawr chhiat tum a ni.

Serchhip district thuneitute chuan, nawr chhiatsak kher ngai lo tura an in leh lote ṭhiat turin zangnadawmna dawngtute a hriattir nawn leh bawk. NH-54 kawngpui laih mekah hian Serchhip district-a zangnadawmna dawng tawh zingah 93% chuan an inte an ṭhiat tawh.

NH-54 kawngpui zauh tura ram laka zangnadawmna pek tawhte chu kumin July leh August thla khan magistrate-te'n an inah kal chilhin, insawn chhuak tur leh an inte ṭhiat turin thupek (eviction notice) an pe a; August 2023 chhunga ṭhiat ngei tura beisei an nih laiin, nimin thlenga ṭhiat lo la awmte chungah kar leh lam aṭang chuan dan anga hmalak tum a ni.

NH-54 kawngpui laih mek hi March 2024 chhunga hawng hman ngei turin sorkar laipui chuan a hriattir a; kawng laitu company-te chu December 2023 chhunga thawk zo turin na takin a nawr bawk niin sorkar thuchhuah chuan a tarlang.