District-ah vote chhiar turin inbuatsaih

Serchhip, Khawzawl leh Hnahthial district-ah nimin khan MLA inthlanpuia vote tlate chhiar dan turah inbuatsaihna hun hman a ni a, district election officer-te'n an telpui.

Serchhipah chuan Brilliant Higher Secondary School-ah vote chhiar tur, counting official-te tan training buatsaih a ni a; counting assistant mi 45 leh supervisor mi 35 an tel. Vawiinah counting agent-te tan training buatsaih leh a ni ang.

Hnahthialah chuan counting official-te ṭhutna tur ruahmanna hmasa, first randomisation of counting official neih a ni. Hnahthial district-a South Tuipui biala vote tlate chu DC conference hall-ah chhiar a ni dawn a; vote chhiarna tur dawhkan (counting table) pakua ruahman niin, postal ballot-a vote tlate chu returning officer dawhkana chhiar tura tih a ni. December 2, 2023-ah randomisation thawh hnihna tih a ni ang.

Khawzawlah chuan DRDO Conference Hall leh BNRGSK Hall-ah counting official leh observer aiawha vote chhiar lo enpuitu tur counting micro observer-te tan training buatsaih a ni. Khawzawl DC conference hall-ah vote tlate chhiar a ni dawn a, counting table 14 ruahman a ni.