Kum chanve-ah TB vangin mi 62 thi

Ministry of Health & Family Welfare hnuaia Central TB Division aṭanga Joint Supportive Supervisory Mission official-te leh Mizoram sorkara Health department hotute Directorate of Health Services conference hall-ah an inkâwm a; January-June, 2023 chhungin ngawr (TB) vangin mi 62 an thi tih tarlan a ni.

Inkawmhonaah hi National Health Mission (NHM) mission director Dr Eric Zomawia'n a kaihruai a, Mizoram sorkar aṭangin LAD leh MSACS aiawh te, NHM-a nodal officer-te an tel. Sorkar laipui aṭangin joint director (Public Health) Dr Nishant Kumar leh official dangte an tel.

Central team hi TB programme hmalakna endik tur leh pui tura kal an ni a; kum 2025-ah India ram aṭanga TB ûm bo tum a nih avangin TB programme hnathawhte endik turin kum tin an kal kual ṭhin. Mizorama an chàm chhungin Aizawla private hospital leh laboratory te, Falkawna District TB Centre leh Health and Wellness Centre-te an tlawh a, Lunglei district an tlawh bawk.

Nimina inkawmhonaa tarlan danin, kumin 2023-ah January aṭanga October thlengin ngawr (TB) vei rinhlelh mi 12,309 endik a ni a, TB vei mi 1,929 hmuh niin, chu'ng zingah chuan MDR TB vei mi 122 an awm. MDR-TB vei zinga 70% chu tihdam an ni.

January-June, 2023 chhungin TB vanga thi mi 62 an awm a, TB vei zinga 83% chu tihdam an ni. TB vei zinga 12% chu HIV vei tel an ni bawk.