Vote chhiar turin inbuatsaih mek a ni
MLA inthlanpui neih zawh taka vote tlate chhiar turin district hrang hrang an inbuatsaih mek a; nimin khan district eng emaw zatah vote chhiar kaihhnawiha mawhphurhna neite thil pawimawh hrilhfiahna hun hman a ni.
Lunglei Convention Centre-ah master trainer Beitlotha Nohro hoin Lunglei district-a Assembly bial paruka vote tlate dik taka chhiar a nih theihna tura enpuitu leh viltu atana ruat micro observer mi 65-te tan training buatsaih a ni. Vote chhiar danah thil fel lo a awm lo tih tichiang turin vote chhiarna dawhkan tinah micro observer pakhat zel an awm dawn.
Champhai district election officer James Lalrinchhana hoin Champhai district-a vote tlate chhiar tura ruat counting supervisor leh counting assistant mi 29 bakah, micro observer mi 36 tan DC conference hall-ah training buatsaih a ni.
Champhai district MLA bial pathuma vote tlate chu round li-ah chhiar zawh tum a ni a; vote chhiar turte chu vote chhiar ni zing dar 5-ah DC pisaah inhriattir tura tih an ni. Zing dar 5-ah computer hmangin an duty-na tur thlan a ni ang.
Serchhipah chuan Brilliant Higher Secondary School-ah counting agent-te tan training buatsaih a ni a; vote chhiar dan tur leh counting agent-te mawhphurhna zirho niin, Serchhip district-a political party hrang hrang aiawh mi 78 an tel.
Saitual district-a MLA bial pathuma candidate leh agent-te pualin DC conference hall-ah training buatsaih a ni a, DEO Dr Lalngura Tlau-in a telpui. Counting supervisor, counting assistant leh micro observer-te duty-na tur thliar nghal a ni bawk.
Saitual district MLA bial pathuma vote tlate chu DC complex-a hall pathumah chhiar a ni dawn a, round thumah chhiar zawh tura ruahman a ni.
Khawzawl DC pisaah district election officer K Lalrohlua hoin vote tlate chhiar tura ruat, counting official-te duty-na tur thliar a ni. Khawzawl district-a Assembly constituency awm chhun Tuichang biala polling station 28-a vote tlate chu Khawzawl DC conference hall-ah chhiar tur a ni a, dawhkân 14 a awm dawn a, round hnihah chhiar zawh tum a ni.