Northeast Yatra for Lifestyle hawng

Mizoram Pollution Control Board (MPCB) member secretary C Lalduhawma chuan nimin khan MPCB conference hall-ah Mizorama Northeast Yatra for Lifestyle (LiFE) kalpui tur a hawng.

C Lalduhawma chuan, environment venhimna lamah hmalak nasat a ṭul a, mipui zirtir leh an rilru kaihthawh a ṭul thu a zau thei ang bera tihdarh a ngaih thu a sawi a, "Single use plastic khap chungchangah, keimahni'n bul ṭan ila, tichuan, kan chhungte leh mi dang kan zirtir dawn a ni," a ti.

Inkhawmah hian MPCB hnuaia Mizoram EIACP Hub programme officer Benjamin Lalnunsanga Colney-in Mission LiFE chungchang leh Mizorama Northeast Yatra for Lifestyle kalpui dan tur a sawifiah a; Yatra-in a tum ber chu environment him leh tlo zawk neih theihna tura mi tinin environment tana ṭha zawk nunphung an neih theih nana zirtir a nih thu a sawi.

Northeast Yatra for Lifestyle (Life) hi hmarchhak state pariatah November thla chhunga neih tur a ni a, Mizoramah chuan Mizoram EIACP Hub hnuaia din Yatra team-te'n district tinah Yatra an kalpui dawn a ni.

Northeast Yatra for Lifestyles buatsaih chhungin awareness campaign, house to house campaign, mass rally, cycling, lui tihfai hnatlang, hman khat daih sarâng chhar fai hnatlang leh online quiz-te buatsaih a ni ang.