Inthlan result puan dan tur sawiho

Additional chief electoral office H Lianzela hoin nimin khan ICT Conference Hall-ah MLA inthlanpuia vote tlate chhiar huna media centre kaltlanga chak leh awmze nei zawka result puanzar dan tur sawiho a ni.

Additional CEO sawi danin, Assembly bial tin tan general observer leh counting observer pakhat zel ECI-in a ruat a, Mizoram puma vote chhiarna hmun (counting centre) 13-ah counting hall 40 a awm dawn. Counting hall 40 tan EVM-a vote tlate chhiarna dawhkan 399 leh postal ballot-a vote tlate chhiarna dawhkan 56 a awm dawn a, vote chhiartu mi 4,000 chuang awmin, zing dar 8-ah vote chhiar ṭan a ni ang.

Deputy CEO Henry C Lalrawn-kima chuan, inthian result chu encore portal-ah dah luh zel a nih dawn thu leh results.eci.gov.in ah ngaihven theih a nih tur a sawi.

ṬHUTKHAWMA TARLANTE

▶ Counting centre tinah media centre-a awm dawn a, information pek chhàwnna tur a ni.
▶ ECI-in luh phalna authority letter (AL) a siamsakte chauh counting centre-ah luh phal a ni dawn.
▶ Thuneitute ruahmanna siam ang zelin counting hall-ah luh tur a ni a, thla la turte tan video long shoot chauh lak phal a ni.
▶ Mobile phone leh dan phal loh bungraw dang ken luh phal a ni lo.
▶ Counting hall luh dawnah media centre-ah mobile phone dah zel tur a ni.
▶ District tinah media centre buatsaih a ni a, media mite tan information lakna tur leh vote chhiar chhunga ṭhut chawlhna tura ruahman a ni.
▶ Media centre tinah IPR officer an ṭhu ang.