BJP telna sorkar a piang dawn - Dr K Beichhua

Mizoram MLA inthlanpui 2023-a Saiha biala BJP candidate Dr K Beichhua chuan nimin khan Mizoram BJP pisaa inkhawmah thu sawiin, kumina inthlanpuiah hian BJP telna sorkar a piang ngei dawn niin a sawi.

Dr K Beichhua chuan, "2023 MLA election kan neihah hian BJP tel ngei ngeina sorkar a piang ngei dawn. Party dang chu sorkar châkin an tuihâl a, mahnia sorkar turin an inngai ṭheuh a, mahse, neutral leh intellectual lam chuan a mala sorkarna siam an awm an rin loh thu an sawi. Chuvangin, keini chu a mala sorkarna siam thei ni lo mah ila, Mizorama sorkar thar lo piang turah erawh kan tel ngei a rinawm a ni," a ti.

India ramah BJP an la sorkar zel a rinawm nia sawiin K Beichhua chuan, "BJP-a ka lut hi Pathian remruat dik tak a ni a, Pathian min hruaina a ni. Mahni mamawh petute do hi mifing tan chuan tih chi a nih loh avangin kan thawhpui thiam mai tur a ni a, a mamawhtute zawk kan lo induh tlat chuan a fuh thei lo," a ti a; kum 2024-a Lok Sabha inthlanah BJP telna sorkar a piang dawn niin a sawi.