Kum 2022-23 chhungin Mizoramah nausên thi 363, nau chunga thi 18

25th November, 2023

Sorkar kum liam ta 2022-23 chhung khan Mizoramah nausen kum khat hnuai lam 363 an thi a, nau chunga nu thi 18 an awm. Sorkar laipui aṭanga record tihchhuah thar berah chuan nausen thi zat tehnaah Mizoram dinhmun a ṭha ber.

Mizoram Health department hnuaia Reproductive and Child Health (RCH) chhinchhiah danin, kum 2022-23 chhung khan Mizoramah nausen kum khat hnuai lam mi 363 an thi a, nausên thi zat tehna, infant mortality rate (IMR) chu 18 (nausen 1,000 zelah 18 an thi tihna) a ni. Kum 2021-22 chhung khan nausen 465 thiin, IMR chu 24 a ni a, kum 2021-22 aiin 2022-23 dinhmun a ṭha zawk.

Kum 2022-23 chhung vêk khan nausen thla khat la pumhlûm lo 202 an thi a, neonatal mortality rate (NMR) chu 10 (nausen 1,000 zelah 10 an thi tihna) a ni a; kum 2021-22 chhung khan nausen thla khat la pumhlûm lo 331 an thi thung a, NMR chu 17 a ni.

Sorkar kum liam ta chhungin Mizoramah raicheha thi (nau chunga thi) nu 18 an awm a, maternal mortality rate (MMR) chu 90 (nu 1,00,000 zelah 90 an thi tihna) a ni a; kum 2021-22 chhung khan nau chungah nu 25 thiin, MMR chu 131 a ni. Kum kal mek 2023-24 chhungin nau chungah nu 10 an thitawh bawk.

Sorkar laipui aṭanga Mizoram RCH dinhmun endiknaa dinhmun tarlanna, Sample Registration System (SRS)-in a tarlan thar ber chu kum 2020-21 dinhmun kha a ni a; chutah chuan Mizoram IMR chu 3 niin, IMR hniam berna state a ni. Kum 2019-20 SRS-ah pawh Mizoram IMR chu 3 a lo ni tawh a; kum 2018-19 ah 5 leh kum 2017-18 ah 15 a ni thung.

Mizoram RCH state programme officer Dr Lily Chhakchhuak chuan Vanglaini zawhna chhángin, Mizoram chu nausen thi zat tehna IMR-ah India rama hniam ber, dinhmun ṭha ber a nih thu a sawi a, "SRS hi sorkar laipuiin an endikna leh tehna a ni a, SRS-ah hian kum 2017-18 ah kha chuan Nagaland nen kan intluk viau a, a hnuah Mizoram IMR a hniam zawk tâk avangin tunah chuan India ramah IMR hniamna ber kan ni," a ti.

Hetih lai hian, National Family Health Survey (NFHS) chhinchhiah danin, Mizoram total fertility rate - nupa tuakin fa an neih zat chawhrual chu kum 2015-16 khan 2.3 a ni a, NFHS hnuhnung ber kum 2019-20 ah chuan 1.9-ah a tla thla tawh.

RCH hotute chuan total fertility rate sawifiahin, NFHS hnuhnung bera Mizoram total fertility rate 1.9 chu chawhrualin Mizorama nupa tuak khatin fa pahnih an nei tling lo tihna a nih thu an sawi.