ABC inkhawmpui ṭan a ni

Mizoram Baptist Kohhrana inkhawmpui lian ber dawttu, Area Baptist Council (ABC) inkhawmpui chu nizan khan hmun hrang hrangah ṭan a ni. Inkhawmpui hi November 26, Pathianni zan thleng neih a ni dawn a, vawiin hian nilengin rorel a ni ang a, naktuk Pathianni chawhma inkhawmah kohhran upa nemngheh a ni ang.

Baptist Church of Mizoram (BCM) hnuaiah hian ABC 17 a awm a, ACB zawng zawngah inkhawmpui neih a ni. Kumin March thlaa BCM Assembly-a tarlan danin, BCM-ah hian member 1,76,404 awmin, mipa 87,236 leh hmeichhia 89,168 an ni a; tualchhung kohhran 680, pastor bial 92 leh kohhran chhungkua 38,919 an awm.

BCM-ah hian minister/pastor 151 leh probationary pastor 22 an awm a; kohhran upa 3,294 an awm bawk. Kumina ABC inkhawmpuiah hian kohhran upa atana nemngheh tur mi 206 an awm nia thu dawn a ni.