Joint NGO hruaitute'n ECI hotute an hmu thei lo

NGO Coordination Committee hruaitute chuan nimin khan Election Commission of India (ECI) hotute hmuh an tum a, an hmu thei lo.

Tarlan tawh angin, NGO hruaitute hi Mizoram Assembly inthlanpuia vote tlate chhiar hun tura ruat December 3, 2023 chu Pathianni a nih avanga ni danga sawn tura ECI hotute hmaichhana ngen tuma kal an ni a; November 23, Ningani khan Aizawl aṭangin Delhi an pan.

NGOCC hruaitute hian appointment nei sa lo chungin nimin khan ECI hotute hmuh theih beiseiin ECI pisa an pan a, mahse, an hmu thei rih lo. NGOCC secretary Prof. Malsawmliana chuan, "Kan hmuh theih hun tur kan sawi thei lo a, naktuk (Inrinni)-ah hmuh leh kan tum dawn a, kan bei zel phawt ang," a ti.

NGO Coordination Committee hruaitute hi deputy chief minister Tawnluia'n nimin zing khan Mizoram House, Delhi-ah a kâwm a, duhsakna a hlan bakah, an senso phuhrûkna atan Rs 50,000 a hlàn. Ningani zan khan Rajya Sabha MP K Vanlalvena'n zanriah a kîlpui bawk.