Rin thua tling tur leh tling lo tur lo sawi vak vakin awmzia a nei lo - Zoramthanga

MNF president Zoramthanga chuan, rin thua bial tina tling tur leh tling lo tur sawi rawtui vak vakin awmzia a neih loh thu leh, 'Nang malsawmna ni ang che' tih chu MNF-in thuthlunga an hman mek a nih thu a sawi.

Zoramthanga hian nimina Mizo Hnam Rûna inkhawmah thu sawiin, "Party dangte angin vawiinah rin thu maia bial tina tling leh tling lo tur lo sawi rawtui vak vakin awmzia a nei lo. Vote a tla vek tawh a, engkim ti theitu Pathian hnenah ṭawngṭai erawh chuan awmzia a nei... Kan Zoram hi a tìr aṭanga Pathianin a kaihhruai danah ro a rel zel a, kawng chanveah Lalpa'n min kalsan lo ang," a ti.

MNF thuthlungte sawiin Zoramthanga chuan, "Nang malsawmna ni ang che tih hi MNF chuan thuthlunga kan hman mek a ni. Ram thuthlung neiin, lal thuthlung kan nei leh a, chu chu missionary-te'n chanchin ṭha min rawn hrilh leh kha a ni. Chu ram leh Lalpa thuthlung venghim tur chuan hnam thuthlung kan nei a, chu chu Mizoram chhunga chengte tan chauh ni lo, khawvel hmun hrang hranga Zo hnahthlakte tan a ni. Malsawmna thuthlung kan nei leh bawk," a ti a, malsawmna thuthlung chu an kalpui leh buaipui mek a nih thu a sawi.

MNF President chuan, tun hnaiah Manipur minister leh MLA-te'n amah an hmuh thu sawiin, Naga lam be tura an ngen thu a sawi a; Manipur dinhmun dik tak chu India sorkar hnenah theihtawpa thlen reng a pawimawh thu a lo hrilh niin a sawi bawk.

Zoramthanga chuan, Europe, Asia leh India ram khawpui hrang hrangah Aizawl anga Pathianni tûka inkhawm kawng zawh mup mup ṭhin khawpui dang an awm ve lo nia sawiin, "Zoram hi Lalpa'n hmanruaah a hmang ang tih ring ngam ang u. Kan lamah Lalpa ṭang lo se, kum 60 chuang MNF hi a kal lo ang," a ti a; hnam movement leh inremna neih dante chu ṭhangtharte'n hre chiang se a duh thu sawiin, "MNF-a bul ṭan ṭha tak takte pawh politics thlichhiain a lenkual hnuah a tàwpah MNF-ah bawk an lo lut leh ṭhin a ni," a ti.