KHAWTHLIR

KTP-in thisen pe

KṬP, Rengtekawn bial chuan nimin khan Rengtekawn Kohhran Hall-ah thisen pek an huaihawt a, Kolasib District Hospital tan thisen unit 41 an pe a, petute mipa 38 leh hmei­chhia pathum an ni.

Heroin man

Excise & Narcotics chuan nimin zing dar 4:15 khan Myanmar leh India ramri, Ṭiau lui (Zotekai)-ah heroin gram 247.600 leh a neitua puh Thangkhenlian (47) s/o Thangzakap, Bulfek, Myanmar-a khawsa nia inchhál an man. Heroin hi Myanmar aṭanga lak, Mizorama hralh tum a ni a, NDPS Act, 1985 tlawhchhanin thubuai ziah luh a ni.

Hlabu tlangzarh

KṬP General Conference vawi 60-na, nakkuma Ngopaa neih tura hman tur hlabu chu nizan khan Synod Conference Centre-ah Central KṬP leader Rev. Dr F Pachhunga'n a tlangzarh. KṬP General Conference hlabu-ah hian hla 60 dah a ni a, hla thar a awm rualin, hla hlui eng emaw zat a awm a; copy 55,000 chhut a ni.

Wayne Cole

Wayne Cole tih American spy thawnthu, Joe Ngurdawla (L) ziah chu chhut ṭhat leh a ni a, nimin khan Aijal Club-ah Mizo Academy of Letters (MAL) president Dr RL Thanmawia'n a tlangzarh. Wayne Cole tihchhuah nawn lehnaah hian thawnthu pasarihte chu lehkhabu pathumah dah a ni a, Rs 300, 400 leh 500 mante a ni. Joe Ngurdawla hi Mizoram UT-a inthlan hmasa ber 1972 khan Sairang bial aṭangin MLA atan thlan tlin a ni a, January 23, 1996 khan a thi a ni.

Lawmman hlân

Canara Bank, Aizawl branch chuan Canara Vidya Jyothi scheme kaltlangin November 22-23, 2023 khan middle school leh high school palia hmeichhe zirlai, exam-naa ti ṭha mi 12 hnenah cash incentive award an hlân. Abundant Life Home, Durtlang leh CPD Transitional cum Childrens Home, Saron Veng hnenah thawmhnaw tihrona (clothes dryer), onoma locker, naupang kawrlum leh ei tur ṭhahnem tak an pe bawk.