NGO-te'n ECI hotute an hmu dawn; Kohhrante'n NGO-te an ṭawngṭaisak

NGO Coordination Committee (Joint NGO) hruaitute chuan Mizoram inthlanpui vote chhiar hun sawn tura ngen turin Election Commission of India (ECI) hotute an hmu thei dawn. NGO-te tan hian November 25 & 26 zan khan kohhrante an ṭawngṭai rual.

Joint NGO hruaitu mi pangate chu ECI hotute an pisaa hmaichhana hmu tur leh Mizoram MLA inthlanpui vote chhiar ni atana ruat December 3, Pathianni sawn tura ngen turin November 23, 2023 khan Delhi an pan a; November 24, Zirtawpni khan ECI hotute hmuh tumin an pisaah an kal a, nilénga an nghâk chungin an hmu thei lo.

Mizoram NGO hruaitute hian November 25, Inrinni-ah ECI hotute hmu turin an pisaah kal leh tumin an inruahman a; mahse, ECI hotute'n November 28, 2023-ah appoinment an pek theih tâk avangin, appointment an neih hun chu an nghak ta zawk a ni.

Vote chhiar ni sawn tura ECI-a ngenna vawi thum thlen tawhtu Mizoram Kohhran Hruaitute Committee (MKHC) chuan kohhran pawl hrang hrangte chu vote chhiar ní sawn tura ngenna a hlawhtlin theih nan ṭawngṭai turin an ngen.

MKHC, political party-te leh NGO Coordination Committee-te’n vote chhiar ni sawn tura an hmalakhonaah hmasawnna a la awm lo chu pawi an tih thu tarlangin MKHC chuan, "Chief Election Commissioner (New Delhi) hmu tura NGOCC hotu lamkalte’n November 28, 2023 (Thawhlehni) hian CEC an hmu thei dawn a, inthlan vote chhiar ni sawn tura an hmalaknate a hlawhtlin ngei theih nan kohhranhote ṭawngṭaipui turin kan inngen a ni," an ti.

Mizoram Synod pawhin tualchhung kohhrante hnenah lehkha tichhuak ve nghalin, an kohhrante chu ṭawngṭai rual turin an ngen bawk a; MKHC leh Synod hian November 25/26 (Inrinni/Pathianni)-a kohhran inkhawmah a remchan anga ṭawngṭai rual turin an ngen a ni.

Mizorama tualchhung kohhran zinga tam tak chu November 25, Inrinni zan khan an ṭawngṭai rual tawh a; nizan lama ṭawngṭai rualte pawh an awm bawk.