ABC-ah kohhran upa 206 nemnghet

Mizoram Baptist Kohhrana inkhawmpui lian ber dawttu, Area Baptist Council (ABC) inkhawmpuiah nimin khan kohhran upa thlan thar eng emaw zat nemngheh a ni a, nizan khan inkhawmpui a ṭiak.

Baptist Church of Mizoram (BCM) hnuaiah ABC 17 a awm a, chu'ng ABC 17-ah chuan inkhawmpui neih vek a ni. November 24, 2023 zan khan inkhawmpui ṭan a ni a, November 25, Inrinni khan nilengin rorel a ni. Rorelah hian kohhran leh ABC chhung thil pawimawhte bakah, Mizoram pum huap kaihhnawihte rêl a ni a, ABC páwn lam kaihhnawih thilte chu BCM inkhawmpui lian ber Assembly ngaihtuah tura thlen a ni ang.

Nimin khan chawhma inkhawmah ABC hrang hrang inkhawmpuiah kohhran upa nemngheh inkhawm neih a ni a, ABC 17-ah kohhran upa 206 nemngheh an ni. Chawhnu inkhawmah Lalpa Zanriah Sakramen ṭheh a ni bawk.