KHAWTHLIR

Kawng khâr dawn

Armed Veng South leh Bethlehem Vengthlang (District Jail péng leh Dawrpui thlanmual) inkar kawng thawm ṭhat hna thawh a nih dawn avangin, kawngpui hi November 28, 2023 aṭangin khàr a nih dawn thu Traffic SP Stephen Lalrinawma'n a tarlang. Kawng khâr hian hna thawh zawh hma chu a huam dawn a, hnathawh tibuai theia lirthei leh bungrua dah khap a ni.

Thilpek hlan

Foundation for Drug-Free Mizoram chuan an member-te'n Krismas puala an thawh khawm Rs 1,00,000 hmanga an lei - buhfai, dailuah, alu leh thil dangte chu November 25, Inrinni khan ruihhlo ngaite enkawlna hmun pathum hnenah an hlan. Ṭanpuina an peknate chu - Phunchawnga OKM Home, Durtlang North-a Jeriko Khualbuk leh Chaltlanga Khawngaihna In-te a ni.

MUP-in thianfai

Rulchawm khuaa Mizoram Upa Pawl (MUP) member-te chuan November 25, Inrinni zing khan hnatlangin an khaw bulhnaia kawng sir bawlhhlawhte an thianfai a, an hal ral nghal. Rulchawm MUP hruaitute chuan zin veivakte'n an thil eina kâwrte kawngsirah paih mai loin, a paihna hmun tura tihah paih zel se an duh thu an sawi.

Ayurvidya buatsaih

Health & Family Welfare department hnuaia Directorate of Ayush chuan November 24, 2023 khan Kolasib-a Home Missions School-ah Ayurvidya (School Health and Education programme) an buatsaih a; Kolasib District Hospital-a medical officer (Ayush) Dr C Vanlalhlimpuia hoin Dr Lalrinzuali leh thawktu dangte'n an hmanpui. A thlawna inentirna buatsaih niin, zirlai leh zirtirtu mi 97-te hriselna dinhmun endik a ni a, a thlawnin damdawi an sem bawk.

Biak-in hawng

Upper Republic Presbyterian Kohhran biak-in thar chu November 25, Inrinni khan Synod moderator Rev. Dr C Chawnghmingliana'n a hawng. Biak-in thar hi Rs 13,52,17,951 sénga sak a ni a, November 2014-ah sak ṭan niin, mi 990 len theihna tura sak a ni.