Kum 2022-23 chhungin Mizoramah dama naute piang 19,956, thi 176

Sorkar kum liam ta, 2022-23 chhung khan Mizoramah sorkarin raipuar hmeichhia 24,314 a chhinchhiah a, nau piang chhinchhiah zingah 19,956 chu dama an pian laiin, 176 chu an thi.

Reproductive and Child Health (RCH), Mizoram chhinchhiah danin, kum 2022-23 chhungin Mizoramah nau piang 19,965 chhinchhiah zinga 17,729 (88.80%) chu damdawi-ina piang an ni a, damdawi-ina piang zing 3,673 chu zai chhuah an ni.

Nau piang 19,965 zinga 2,236 (11.20%) chu in lama piang an ni a, in lama piang zinga 513 chu damdawi lama thiamna nei (doctor/nurse/ANM/midwife)-te enpuina hnuaia piang an nih laiin, a tam zawk 1,723 chu damdawi lama thiamna neite enpui loha piang an ni thung.

Chhinchhiah danin, kum 2022-23 chhungin nau 19,956 damin an piang a, chu'ngte chu mipa 10,316 leh hmeichhia 9,640 an ni. Nau pian hma leh pian laia thi (still birth) 176 a awm.

Nau dama piang zinga 200 chu an pian aṭanga chawlhkar li chhungin an thi a, chu'ng zinga 52 chu an pian aṭanga darkar 24 chhunga thi an ni. Thla khat chhunga thi zinga 34 chu Sepsis vanga thi niin, 29 chu Asphyxia vanga thi an ni a, natna dang vanga thi 85 an awm.

Thla khat chhunga thi mi 200 bakah, kum khat (thla 12) chhunga thi 163 an awm a; an zingah pneumonia vanga thi 49 awmin, thih chhan tam ber a ni. Kum 2022-23 chhungin naute kum 1-5 inkar thi 104 an awm bawk a, chu'ng zinga 39 chu pneumonia vanga thi niin, thih chhan tam ber a ni.

Kum 2022-23 chhung khan nu, nau chunga thi 18 an awm a, chu'ng zinga paruk chu thisen pût (bleeding) vanga thi an ni. Nau tihtlak (abortion) vanga thi pakhat, nau vei rei lutuk leh hring mai thei lo (obstructed/prolonged labour) vanga thi pathum leh thih chhan hriat chian loh pariat an awm bawk.

Mizoram RCH state programme officer Dr Lily Chhakchhuak chuan, Mizoramah nausèn thihna leh nau chunga nu thihna chu khawthlang lam, Bru leh Chakma tamnaah a sang zual tih a sawi.

Dr Lily Chhakchhuak chuan, nikum lamah Lawngtlai RD block chu aspirational block-ah puangin theihtawp an chhuah a, kuminah Lungsen, Reiek leh Ngopa block-te aspirational block-ah puang lehin, theihtawp an chhuah mek thu a sawi bawk.