Kum 2022-a vawk suat neitute tan Central-ah zangnadawmna dil mek

Vawk pûl hri African Swine Fever (ASF) vangin kum 2021-22 chhung khan Mizoramah vawk vulhtute'n cheng nuai 12,858 hù vawk an chán a; kum 2022-a vawk suat neitute tan sorkar laipuiah zangnadawmna cheng nuai 526 dil mek a ni.

RTI Act tlawhchhana zawhna Animal Husbandry & Veterinary (AH&Vety) department-in an chhàn danin, kum 2021-2023 chhungin Mizoramah ASF vanga vawk thi 47,247 leh suat 25,102 a awm a, a vaiin 72,349 a tling.

Kum 2021-2022 chhunga ASF vanga vawk thi leh suatte hlut zawng chu Rs 1,28,58,94,000 nia chhût a ni a; kum 2023 chhunga ASF vanga vawk thi leh suatte hlut zawng erawh kum kal mek a nih vangin chhût a la ni lo.

ASF vanga vawk thi neitute tan sorkar laipui inkaihhruaina (central guidelines)-ah zangnadawmna pek theih a nih loh thu tarlangin AH&Vety SPIO chuan, "Vawk suat (culled) tan chauh zangnadawmna dil theih a nih avangin Mizoram sorkarin sorkar laipuiah zangnadawmna a dil," a ti.

AH&Vety SPIO chuan, kum 2021-a vawk suat neitute hnenah zangnadawmna cheng nuai 1,169.94 pek a nih tawh thu a tarlang a; kum 2022-a vawk suat neitute tan zangnadawmna Rs 5,26,63,300 dil mek a nih thu leh sanction hmuh thuai an beisei thu a tarlang.