Sazuk hâl ral a ni

Hnahlan Forest Range leh Wildlife Protection Squad-te chuan November 25, Inrinni khan District Forest Officer pisa tualah sazuk thi tawh an hâl ral.

Thu dawn danin, Hming­­thanzauva, Zoram­chuana leh Lalrem­zauva, Hnahlan khuate chuan November 23, 2023 khan grape zàmna tur ban an la zo, Thangpui luia inbual tura an kalnaah sazuk thi an hmu niin an sawi a, November 23 zanah Hnahlan Forest Range Office leh Wildlife Protec­tion Squad-ten an pathum hian an man nghal.

Mi pathumte leh sazuk hi November 24 khan Champhai District Chief Judicial Magistrate hmaah hruai an ni a, thu zawhfiah an nih hnuah PR bond ziak tira chhuah lailâwk an ni. Sazuk chu November 25 khan hâl ral a ni.

Champhai hony. wildlife warden Lalhlupuia chuan ring lo mite nungchate laka an ngilneih em em lai leh, sorkarin nungchate humhalhna dan khauh tak a kenkawh laia Mizote'n sapel leh sava veh kan la bansan thei lo chu pawi a tih thu sawiin, "Dan palzuta ramvak ṭhinte'n vanduaina, thihna leh piansualna thlengin an tâwk tam ta hle," a ti a, mi tinte chu nungcha leh an chenna ramngaw humhalhtu ni ṭheuh turin a sawm.