Positive aṭanga Covid-19 kai Mi paruk hmuh chhuah thar a ni
August 16, Pathiannia Zoram Medical College (ZMC) laboratory-a Covid-19 vei hmuh chhuah zingah Mizoram chhunga hripui vei tawh sa aṭanga kai (positive contact) mi paruk hmuh chhuah a ni. Hei vang hian an kai chhawn theih tura ngaihte zawn chhuah hna (contact tracing) ngawrh taka thawh niin, nizan khan mi eng emaw zatte swab sample lâk a ni a, lâk leh tur eng emaw zat an awm bawk.
Chaltlang Lily Venga mipa pathum, kum 11, 17 leh 55-a upate pawhin hripui an vei tih Pathianni khan hmuh chhuah a ni a, nimin khan an kai chhàwn theih tura ngaihte chhui zui nghal niin, nizan lam khan an swab sample lak beisei a ni. Lily Veng khawtlang hruaitute hnen aṭanga thu dawn danin, Pathiannia Covid-19 vei hmuh chhuahte zinga ṭhenkhat chu a hmaa hmuh chhuah tawhte nena inṭhenawm hnaivai an ni tawh lo a; chuvang chuan hripui an kaina pawh hriat chian a har sâwt hle tih an sawi.
Positive contact aṭanga hripui kai nia hriat zinga pahnih chu Sawleng khuaa nurse hmeichhia kum 57 mi leh a tupa kum 10 mi an ni a, an chhungkuaa mi dangte pawh endik niin, hripui vei dang hmuh a la ni rih lo. Sawleng khuaah hian total lockdown puan mek a ni a, mi pahnihin an kai chhàwn theih tura ngaihte village task force-te'n an chhui mek a, hriat theih chinah mi 90 chuangte swab sample lâk tura ruahman a ni. Sawleng nu (nurse)-te chhungkua hi tun hnaia Sakawrdaia Covid-19 vei pakhat an tlawh avangin a hmain an swab sample lak tum a lo ni tawh a, mahse, an lo duh lo nia thu dawn a ni.
Darlawnah pawh positive contact aṭanga hripui kai hmeichhe pakhat, kum 36 mi a awm a, ani hi August 14, Zirtawpnia hripui vei hmuh chhuah tawh, Darlawn damdawi-ina nurse pakhat aṭanga kai nia ngaih a ni. Darlawn khuaah hian total lockdown puan mek a ni a, VTF hruaitute'n contact tracing an buaipui mek a, swab sample lak tur mi eng emaw zat awm mah se, he thu ziah lai thleng hi chuan lak a la ni lo. Darlawn leh Sawleng khuaa swab sample lak turte hi Darlawn damdawi-ina thawkte'n an la dawn a ni.