Kum 3 chhungin Mizoram police-te'n IPC hnuaiah thubuai 7,989 an ziak lut

Mizoram Police chuan kum 2020-2022 chhung khan Indian Penal Code hnuaiah thubuai 7,989 an ziak lut a, thubuai ziah luh zingah rûkrûk lam chi thubuai 5,475 awmin, a tam ber.

Mizoram Police Crime Report 2020, 2021 leh 2022-a tarlan danin, kum thum chhunga IPC hnuaia thubuai ziah luh hrang hrang zingah rûkrûk (burglary/theft) thubuai a tam ber vek a; kum 2020 khan rûkrûk thubuai 1,062 ziah luh a ni a, kum 2021-ah 1,625 leh kum 2022-ah 2,703 ziah luh a ni.

Kum 2020-22 chhung hian tualthah thubuai 85, pawngsual thubuai 77, misuam/rawk (dacoity/ robbery) thubuai 54, mi bum thubuai 517, mi kutthlak thubuai 270, public servant kutthlak thubuai 14, tualthah tumna thubuai 47 leh mi rukbo thubuai 13 a awm.

Kum 2020 khan pawngsual thubuai 36 ziah luh niin, kum thum chhunga ziah luh tam ber kum a ni a; hemi kum vêk hian tualthah thubuai 30, tualthah tum thubuai pakua leh mi kutthlak thubuai 86 ziah luh a ni.

Kum thum chhunga tualthah thubuai ziah luh tam ber kum, kum 2022 khan 31 ziah luh a ni a; pawngsual thubuai 16, tualthah tum thubuai 19, mi bum thubuai 257 leh mi kutthlak thubuai 98 ziah luh a ni.