Scholarship pe kim thawkhat

Mizoram Scholarship Board (MSB) chuan zirlaite hnenah tribal scholarship second instalment an pe chhuak kim thawkhat tawh.

MSB hotute hnen aṭanga Vanglaini thu dawn danin, zirlai, bank account felfaite chu tribal scholarship second instalment sum an account-ah thun vek a ni tawh a; chutih laiin, zirlai ṭhenkhat chu an bank account-ah fel tawk lo a awm avangin pek an la ni lo a, a fel veleh pek nghal an ni ang.

MSB chuan tribal scholarship dawng tura thlan, second instalment la dawng lote tan complaint theih hun an hawng a ni.

Tarlan tawh angin, tribal scholarship second instalment pek phût hian MZP bultumin ni hnih chhung MSB tualah punkhawm a ni a, awmzia a awm loh avangin, MSB-a thawkte pisa kai turte dang leh.

Pisa kai tur an dan hnuah pawh thu lawmawm an la hmuh loh avangin MZP chuan November 16, 2023 tlai aṭangin an pisaah chaw ngheiin lungawi lohna an lantir a, Election Commission of India (ECI)-in scholarship sem phalna a rawn pek avangin hemi zanah vêk hian chawnghei an titawp.

MSB chuan November 17, 2023 aṭang khan tribal scholarship second instalment sum an pe chhuak ṭan. Scholarship dawng tur zawng zawng chu zirlai 19,495 an ni a, chu'ngte chu Mizorama zirna-in 36-a zirlai 5,023, pawl 11 leh 12 zirlai 11,462 leh Mizoram páwna awm zirlai 3,010-te an ni.