National Painting Competition buatsaih

Mizoram State Council for Child Welfare (MSCCW) chuan nimin khan PC Girls School-ah National Painting Competition an buatsaih a, naupang ṭhahnem tak an tel.

Tun ṭuma MSCCW-in National Painting Competition an buatsaih hi vawi 14-na a ni a, Women & Child Deve­lopment director Zoram­thangi Chhangte-in hmanpuiin, lawmman a sem.

Zoramthangi chuan, "Lehkha thiam mai bakah, mahni iráwm chhuak theihna kan tihpun a, ṭangkai taka kan hman hian dinhmun sang takah min dah thei a ni," a ti.

Intihsiakna hi hlawm pali-ah ṭhen a ni a; Green group (kum 5-9) inkarah Lalmuanzuali Ralte, English Congregation School pakhatna niin, White group (kum 10-16) inkarah Srishti Dole Roy, Mary Mount School pakhatna a ni. Red group leh Yellow group chu vohbik naupangte pual a ni a, Ruth Malsawmdawngi, Gilead Special School pakhatna a ni.

Group tina ti ṭhate hnenah lawmman pawisa leh thuchei hlan a ni a, intihsiaka tel zawng zawng hnenah lem ziahna hmanrua leh dearness allowance pek a ni.

National Painting Competition, Mizorama hlawm hrang hranga pakhatna aṭanga pathum­nate lemziak chu Indian Council for Child Welfare, New Delhi-ah thawn a ni dawn a, state danga mite nen an inel leh ang. National level-a ti ṭhate chu kum 18 an tlin thlengin scholarship pek an ni dawn a ni.