Tele MANAS-in thla 11 chhungin Mizoramah call 5,692 a dawng tawh

Mipuiin an harsatnate telephone hmanga an thlenna tur, National Mental Health Programme (NMHP) hnuaia Tele MANAS chu Mizoramah December 30, 2022 khan kalpui ṭan a ni a, kalpui ṭan aṭanga nimin zing thleng khan call 5,692 an dawng tawh.

Tele Mental Health Assistance and Networking Across States (Tele-MANAS) hi sorkar laipuia Ministry of Health & Family Welfare hmalaknaa kalpui niin, nikuma World Mental Health Day - October 10, 2022 khan hawn a ni a, Mizoramah chuan December 30, 2022-ah kalpui ṭan a ni.

Tele MANAS hi telephone hmanga rilru lama harsatna chi hrang hrang neite harsatna sutkianna tura ruahman a ni a, rilru lama harsatna neite sutkiansak turin mithiamte biakràwn tur eng lai pawhin an awm. Mamawhte tan toll free number 14416-ah eng lai pawha biak theih a ni.

National Health Mission (NHM), Mizoram mission director Dr Eric Zomawia hnen aṭanga thu dawn danin, Tele MANAS, Mizoram chuan nimin zing dar 9 thleng khan Mizoram chhung leh páwn aṭangin call 5,692 an dawng tawh a; chu'ng zinga 4,644 chu Tele MANAS hmalakna kal zela call (Tele MANAS initiated call) a ni a, 1,048 erawh chu mi tute'n emaw an duh thua an call (user iniiated call) a ni thung.

Sorkar kum kal mekah, April 1, 2023 aṭanga October 31 thlengin National Mental Health Programme (NMHP), Mizoram hnuaiah rilru lama harsatna nei out-patient department (OPD)-a enkawl mi 5,969 leh in-patient department (IPD)-a enkawl mi 891 an awm a, an vaiin mi 6,860 an ni.

NMHP hnuaiah hian April 1 - October 31, 2023 chhungin Tele MANAS-in call 3,718 an dawng a, call dawn zinga 228 chu mahni intihhlum duhna rilru nei nia insawite an ni. Call dawn tamna ber chu Aizawl district niin, 1,493 a ni a, Mizoram chhung bakah, state páwn aṭangin call eng emaw zat a lut bawk.

MIzoram NMHP hnuaiah hian April 1 - October 31, 2023 chhungin free clinic cum awareness vawi 79 buatsaih tawh niin, free clinic-ah mi 4,941 an inentir a; awareness campaign vawi 189 buatsaih niin, chu'ngah chuan mi 16,576 an tel. Harsatna nei, an in lama tlawh ṭum 115 an nei bawk a ni.

NMHP hnuaiah hian Mizoramah doctor pali awm mekin, Aizawl, Siaha, Serchhip leh Lawngtlaiahte an awm a; district hrang hrangah psychiatric nurse pakua leh community nurse panga an awm a ni.