NGO-te'n ECI an hmu dawn

Mizoram Assembly inthlanpuia vote chhiar ni sawn tura Election Commission of India (ECI) hotute dàwr tura Delhi-a chám mek NGO Coordination Committee (Joint NGO) hruaitute chuan vawiin hian ECI hotute an hmu dawn.

Joint NGO hruaitute hian ECI hotute hmu turin November 23, 2023 khan Delhi an pan a, November 24-ah ECI office-ah kal mah se, hotute an hmu thei lo. November 25, Inrinnia ECI hotute hmuh leh tumin an inruahman a, mahse, Chief Election Commissioner-in November 28, 2023, Thawhlehni tlai dar 3-ah hun a pek tur thu an November 24, Zirtawpni zanah an dawng a ni.

Joint NGO hruaitute hnen aṭanga thu dawn danin, vawiina ECI hotute nen an inkawmna turah hian ECI hotu - chief election commissioner Rajiv Kumar leh election commissioner-te an tel kim dawn.

NGO hruaitute hian memorandum hranpa an keng tawh lo a, NGO, kohhran leh political party-te'n vote chhiar ní sawn tura ngenna an lo thlen tawhte chu an thehlut leh dawn a ni.

ECI-in vote chhiar ní atana December 3, 2023 (Pathianni) a ruat chu ṭha ti loin NGO hruaitute hian Kristiante ni serh (Pathianni leh Inrinni) ni loah vote chhiar hun sawn turin an ngen dawn a; vote chhiar ni sawnna turah duh bik an nei lo.

Joint NGO-te hian ruahmanna an siam dan chuan vote chhiar ní sawn a nih loh chuan protest day an hmang dawn a, hman hun tur leh hman dan tur erawh an la rêl lo thung.