Kolkata-ah Painting Exhibition buatsaih

November 26, Pathianni aṭang khan Art Center, Academy of Fine Arts, Kolkata-ah Lalṭanpuia, Kanan Veng, Aizawl lemziakte pho chhuahna Solo Painting Exhibition buatsaih a ni a, eminent art critics Prasanta Daw-a'n a hawng.

Solo Painting Exhibition hawnna inkhawm hi Nandini Gose-in a kaihruai a, curator chu Amit Mitra niin, ani hian India ram hmun hrang hrangah artist-te tan exhibition a buatsaih tawh ṭhin. Mizoram IPR department-in exhibition fund a neih aṭangin exhibition buatsaih hi an pui bawk. Exhibition-ah hian water colour hmanga lemziak 30 tarlan a ni a, December 2, 2023 thleng a awh ang.

Prasanta Daw chuan, India rama hnam chi hrang hrangte'n mahni hmun ṭheuhah art kalpui dan an neih vek thu a sawi a, "Mi huaisente kut chhuak aṭangin kan hmuh ngai loh art work ṭha tak tak a lo piang chhuak zel a, hei hian inpawhna ṭha, inpumkhatna min siamsak a, India ram hi art-a a hausakzia leh a ropuizia a lantir ṭhin," a ti.

Indian art history-ah Mizo hming sawi lan tur awm rih lo mah se, Indian art history-te chu Mizote ta tho a nih thu sawiin Prasanta Daw chuan, "Vawiin nia lemziak pho chhuahte aṭang hian Mizo artist-te'n theihna an neih sànzia ka hmu a, Indian art kan sawiin Mizote hming kan lam tel a ṭul hun a thleng thuaiin ka ring," a ti a; art chu mite hnena hriatna petu, hahchawlhna petu leh hnam hrang hrangte phuar khawmtu a nih thu a sawi.

Aizawl Art Gallery neitu Lalṭanpuia pawhin thu sawiin, West Bengal, art history sûlhnu ropui tak nei tawhah solo exhibition a nei thei chu lawmawm a tih thu a sawi a; Mizo artist-te chu Indian artist zinga hlawhtling ber ber an nih theih nan hma an lak zel tur thu te, India ram khawpui hrang hranga art gallery-ah Mizo artist-te an inlan theih nan hmalak zel an tum thute a sawi bawk.