Vote chhiar turin inbuatsaih
November 7, 2023-a Mizoram MLA inthlana vote tlate chhiar turin nimin khan Siaha leh Khawzawlahte inbuatsaihna kalpui a ni.
Election Commission of India thupek angin Siaha district-a constitency pahnih - Saiha leh Palak biala returning officer, assistant returning officer leh informaton technology team-te tan vote chhiar chhinna buatsaih a ni.
Vote chhiar chhinnaah hian vote chhiar nía ENCORE-a data dah luh dan tur a taka kalpui chhin a ni a; vote chhiar ní-ah harsatna awm loa vote tlak dan kimchang taka tar chhuah a nih theih nan enchhinna hi ruahman a ni. Siaha district-a Assembly bial pahniha vote tlate chu Siaha College-ah chhiar a ni ang.
Nimin vek khan Khawzawl DC office-ah service voter-te vote ‘Electronically Transmitted Postal Ballots’ pre-counting demo leh Suvidha Test login te neih a ni.
December 3, 2023-a vote chhiar hunah ETPBS hmang hian vote tlate chu an nung ngei em tih finfiah hmasak tur a ni a; nimin khan service demo vote 100 chu a nung ngei a ni tih fiah chhin a ni. Khawzawl district-a Assembly constituency awm chhun Tuichang biala vote tlate hmangin ENCORE-ah result siam chhin a ni bawk.