Hriselna lam thuah Mizo mipate Inenkawl uluk lehzual a ngai - Lalruatkima

Aizawl West-II bialtu MLA Lalruatkima, minister chuan nimin khan Tuikual South MHIP building a hawng a, hriselna lam thuah Mizo mipate inenkawl uluk lehzual a ngaih thu a sawi.

Lalruatkima chuan chhungkuaa dinhmun pawimawh tak chelhtu chu hmeichhia an nih thu sawiin, "Tunlai hian hmeichhia leh mipa kan in tam hleih ta hle. Death rate en pawhin mipa kan thi nasa em em mai a, hei hi a pawi tak zet a ni. Kan hriselna lam thuah pawh Mizo mipate kan inenkawl uluk lehzual a ngai hle a ni," a ti.

Eizawnna leh sum­dawnna lamah pawh Mizo hmeichhiate indaih zai ta hle tih sawiin Lalruatkima chuan, "Khawiah nge Mizo mipa kan awm tak? tih tur hial a ni ta a ni. Mizo mipate'n chak lo zawka kan ngaih hmeichhiate aṭang hian kawng hrang hrangin zir tur kan ngah," a ti a, taihmakna, tumruhna, teirei peihna leh kawng hrang hranga Mizo mipaten hmeichhiate kan entawn a ngai ta hial zawka a lan thu a sawi.

Lalruatkia chuan Mizoramah NGO ṭha tak tak kan nei tih sawiin, "Sorkar leh kohhrante nen NGO hi ṭangtlangin Zoram tan an ṭangkai takzet. Heng lungthu pathum avang hian kan ram leh hnam leh sakhua pawhin a him phah a, hripui len lai pawhin an ṭanrual ṭhat zarah kan damkhawchhuak thei a ni," a ti.

Aizawl West-II Bialtu MLA-in a hawn tak Tuikual South MHIP building hi MLA fund cheng nuai 5.51 leh bialtu corporator R Thanglura, dy. mayor fund hmanga sak a ni.