KHAWTHLIR

KTP-in thisen pe

KṬP, Salem Veng Branch, Aizawl chuan an branch din champha vawi 45-na pualin nimin khan Salem Veng PES Hall-ah thisen pek rûnpui an huaihawt a, Synod Hospital tan thisen unit 59 an pe a, petute mipa 51 leh hmeichhia pariat an ni.

Inthlan sawihona

Aizawl College-a Political Science department chuan vawiin hian Mualpuia an campus-ah Mizoram Legislative Assembly inthlanpui neih tâk chungchang sawihona leh zirhona an buatsaih dawn a; college hrang hranga mithiamte'n thupui an sawi dawn bakah, mi chi hrang hrangin an sawiho dawn a ni.

Khawmpui hmang

Mizoram State Govt. Employees Group D Association, Khawzawl district chuan nimin khan Khawzawl Electric Veng BNRGSK building-ah inkhawmpui leh hruaitu thar thlanna hun an hmang a, Aizawla an hmunpuia hruaitute'n president Zothanpuia hoin an hmanpui. Khawzawl Group D Association-ah hian member 104 an awm a, Khawzawl bakah, Biate, Sialhawk, Khawhai leh Kawlkulahte member an nei a ni.

In saksak

YMA, Kolasib Vengthar Branch chuan an veng chhunga hmeithai, chhungkhat laina hnai nei lo chu nimin khan chenna in tur an saksak. In sak hnatlangah hian mi eng emaw zat an thawk chhuak a, Assam type-a sak a ni.

Training neihpui

Impulse NGO Network, Shillong, CodNerc, Mizoram leh META company-te chuan Aizawl district chhunga 'Meta Small Business Academy Training' an kalpui mekah nimin khan Synod Multipurpose Training Centre (SMTC) a zir mekte pualin training an buatsaih a; social media chi thum - Facebook, WhatsApp leh Instagram hmanga hlâwk zawka sumdawnna kalpui theih dan tur an zirtir a ni. Training hi November 23 aṭanga ṭan chhoh niin, November 23, 2023 ah Febry Institute of Skill Development & Training Centre, Ramhlun South-a zirlaite training an neihpui a, November 25 ah Vocational School of Education, Chaltlanga zirlaite nen training neih leh a ni.