Mizoram vote chhiar ní sawn turin NGO hruaitute’n ECI hotute an ngen: ‘Beiseina sang tak kan nei’ - NGOCC

NGO Coordination Com-mittee (NGOCC) hruaitute chuan nimin tlai dar 3 khan Chief Election Commissioner (CEC) leh Election Commission of India (ECI) hotu dangte ECI pisaah an hmu a, Mizoram inthlan vote chhiar ni - December 3, 2023 chu sawn turin an ngen. Vote chhiar hun sawn chungchangah beiseina sang tak an neih thu NGO hruaitute chuan an tarlang.

ECI hotute hmuhnaah hian NGOCC chairman Lalhmachhuana (Central YMA president), secretary Dr Malsawmliana (CYMA general secretary), MUP vice president Lalbiakmawia Khiangte, MZP president H Lalthianghlima leh MSU finance secretary Lalrampana te an tel.

ECI lam aṭangin chief election commissioner Rajiv Kumar leh election commissioner pakhat bakah, deputy election commissioner dangte'n an lo dawngsawng a, an inkawm a ni.

NGOCC hruaitute chuan, Mizoram inthlanpui vote chhiar hun tura ruat December 3, 2023 chu Pathianni a nih avangin ni danga sawn turin ECI hotute an ngen a, an ngenna chungchangah ṭha takin an inkâwm tih an sawi.

Inkawmhonaah election commissioner pakhat a tel loh avangin NGOCC duh dan leh ngennate chu member kima an sawiho vat tur thu CEC Rajiv Kumar-a'n a sawi tih NGO hruaitute chuan an tarlang a, "Beiseina sang tak kan nei a ni," an ti.

NGOCC Chairman chuan Vanglaini zawhna chhángin, "Aizawl aṭangin theihtawpin kan inbuatsaih a, kan inkawmnaah pawh theihtawp kan chhuah," a ti a; ECI hotute nen darkar chanve vel chhung an inkâwm thu a sawi.

NGOCC hruaitute chuan, vote chhiar hun sawn chungchangah leh ECI hotute hmuh an tum chungchangah Mizoram mipui, kohhran hrang hrang leh political party-te ṭanrualnaah an lawm tak zet tih an tarlang bawk. NGO hruaitute hian vawiinah Aizawl an rawn pan nghal dawn a ni.

Tarlan tawh ṭhin angin NGOCC chuan vote chhiar hun sawn chungchangah hian ECI hotute dawr phawt a, awmzia a awm lo a nih chuan protest day hman an rêl a ni.