2023-24 chhungin mi 1,884-te mit zai tawh

National Programme for Control of Blindness and Visual Impairment (NPCBVI) hmalakna hnuaiah sorkar kum kal mek, 2023-24 chhungin mi 1,884-te mit zai a ni tawh.

NPCBVI chhinchhiah danin, sorkar kum kal mekah October 31, 2023 thleng khan Mizoramah mi 1,884-te mit (cataract) zai a ni a; kum 2021-22 chhung khan mi 1,822 leh kum 2022-23 chhung khan mi 3,725-te mit zai a ni.

National Health Mission (NHM) mission director Dr Eric Zomawia'n Vanglaini a hrilh danin, India ramah mitdelna tihtlâkhniam a nih theih nan sorkar laipui chuan kum khat chhunga mit zai zat tur bithliah (target) a siam ṭhin a; mahse, Mizoramah chuan thawktu indaih lohna vangin target a pha lo rih hle.

Financial year kal mekah October 2023 thlengin mit pek (eye donation) kaltlangin mi 52-te mit thlâk a ni a; kum 2022-23 chhungin mi 55 leh kum 2021-22 chhungin mi 66-te mit thlâk a ni.

NPCBVI hmalakna hnuaiah April-October, 2023 chhungin Mizoramah zirlai naupang mit ṭha lo 389 hnenah a thlawnin tarmit sem a ni tawh a; kum 2022-23 chhung khan zirlai naupangte hnenah tarmit 2,573 leh kum 2021-22 chhungin 2,411 a thlawna sem a ni bawk.