Ayushman Bharat Health Account Mizoramah mi 4,12,506-in an nei tawh

Ayushman Bharat Digital Mission (ABDM), Mizoram chuan nimin khan Aijal Club-ah Ayushman Bharat Digital Mission chungchang inzirtirna an buatsaih. Mizoramah mi 4,12,506-in Ayushman Bharat Health Account (ABHA) an nei tawh tih tarlan a ni.

Zirhona hi ABDM state mission director Dr Eric Zomawia'n a kaihruai a; Non-Government Hospital Association of Mizoram (NGHAM) hruaitu te, mimal damdawi-in, mimal clinic leh laboratory, dental clinic leh software company aiawhte an tel.

Dr Eric Zomawia'n ABDM chungchang a sawifiah a, National Health Authority aiawh Dr Hardik Sankhkla, Dr Pallabi Roy leh Dr Pooja Thakur te, Youth for Action Mizoram president Micheal F Lalsangliana, NGHAM vice president Dr Lalrinawma Hnamte ten thu an sawi a, sawihona hun hman a ni.

Inkhawma tarlan danin, ABDM hi Mizoramah October 1, 2022-ah kalpui ṭan a ni a; tun thlengin Healthcare Professional Registry leh Healthcare Facility Registry hnuaiah sorkar leh mimal hnuaia damdawi kaihhnawih thawktu mi 1,314 leh damdawi kaihhnawih hmun (health facility) 544 an inziak lut tawh a; mi 4,12,506-in Ayushman Bharat Health Account an nei tawh.

ABDM hi India rama information technology (IT) hmanga hriselna lama inenkawlna (healthcare system) ṭhuamṭhat leh chawikanna tura ruahman niin, India ram khua leh tui zawng zawng tana siam a ni a, September 27, 2021 khan Prime Minister-in a tlangzarh.

ABDM-ah hian péng pathum - Ayushman Bharat Health Account (ABHA), Healthcare Professional Registry (HPR) leh Healthcare Facility Registry (HFR) te a awm a; peng pathum hi hmun khatah dahin, damdawi-in te, doctor-te leh mipuite a thlun zawm dawn a ni.

August 23, 2023 khan Aizawlah ABDM hnuaia 100 Microsite Project - Category B Microsite tlangzarh a ni a, Youth for Action chu hma la tura thlan a ni.