Chhingchhipah sorkarin in a nawr ṭhiat

Serchhip district chhunga National Highway-54 zauh leh siam hna thawhna tura ram lak neitu, zangnadawmna la tawh, in la ṭhiat lote zinga pakhat chu sorkarin nimin khan JCB hmangin a nawr ṭhiat. In la ṭhiat lote lakah dan angin hmalak chhunzawm zel a ni dawn.

NH-54 kawngpui siam mekah hian Serchhip district-a sorkarin ram a lâk tawh, zangnadawmna (compensation leh rehabi-litation and resettlement) pawh dawng tawh zingah in ṭhiat duh lo an awm nual a ni.

In ṭhiat duh lote chu kumin July leh August thla khan Serchhip district sorkar hotute'n an inah kal chilhin, an inte chu ṭhiat turin thupek (eviction notice) an pe a, November 22, 2023 khan Serchhip DC-in a hmunah tlawhin a endik leh bawk. Bawrhsap chuan in la ṭhiat lote chu ṭhiat vat tura hriattirin, an ṭhiah loh chuan tun kar chhunga nawr chhiatsak an nih tur thu a hrilh a ni.

Bawrhsapin November 22-a a tlawh hnuah in la ṭhiat lo an awm avangin nimin khan executive magistrate Lalhruailiana Zote leh Dr Albert Vanlalruata bakah, Serchhip SDPO PB Singh te chuan Chhingchhipa in la ṭhiat lote chu an tlawh a; Chhingchhip Venghluna Lalthuthlunga Hnamte s/o Lalnunthari in chu excavator (JCB) hmangin an ṭhiat ta a ni.

Chhungkaw pahnih dang chuan an in an ṭhiat mek a; sorkar hotute chuan ṭhiahsak ngai loa ṭhiat chhunzawm zel turin an hriattir nghal.

Chhingchhip khuaa in ṭhiahnaah hian Serchhip aṭangin police ṭhahnem tak an kal a, kawngpui enkawltu NHIDCL leh contractor te, khawtlang hruaitute an tel a, buaina leh harsatna awm loin ṭhiah a ni.

District thuneitute chuan zangnadawmna la tawh, mahni in la ṭhiat lote chungah dan anga hmalak chhunzawm zel a nih dawn thu an sawi.