Myanmar sipai 30 an rawn tlânchhe leh

Siaha district epa awm Chin state-a Myanmar sipai 30 chu nimin zing khan Mizoram chhungan rawn tlânchhiain, Assam Rifles hnenah an inpe nia thu dawn a ni.

Thuneitute aṭanga thu dawn danin, Siaha district-a Laki khua aṭanga hla vak lo, Myanmar Chin state-a Lailenpi-a awmte nia hriat an ni a; Lailenpia sipai camp chu November 27, Thawhṭanni lam khan Chin National Army kaihhruaiin mipui sipai te'n an bei a, Myanmar sipaite chu an tlanchhia ta nia sawi a ni.

Chin state tho, Rihkhawdar leh Ṭiau Khawmawi khuaa Myanmar sipai camp-te Chin Defence Force (CDF)-te'n November 13, 2023-a an lak avangin Myanmar sipai 42 chu Mizoramah rawn tlânchhiain, Mizoram police hnenah an lo inpe tawh a; November 13 khan Hnahlan helipad aṭangin Myanmar lama haw turin Assam Rifles-in an thawn kîr.

Chin state-a Tuibual khuaa Myanmar sipai camp pawh Chin National Defence Force (CNDF)-te'n November 14, 2023 zan khan an la a, camp-a awm Myanmar sipai 29-te chu Mizoram lamah tlanchhiain, November 16-ah Saikhumphai Ṭiau kài an thleng a, an ralthuamte nen Mizoram police kutah an inpe a ni. Mizoram police-te'n Assam Rilfes hnenah an hlan chhâwng a, AR-te chuan November 19 khan Vaphai aṭangin helicopter-in an thawn chhuak a ni.

Heti hian tun thla (November 2023) chhunga Myanmar sipai Mizorama rawn tlanchhe tawh chu mi 101 an chuang tawh a ni.