Covid-19 vei tawh zat 792

August 16, Pathianni khan Mizoramah Covid-19 vei mi 12 hmuh chhuah a ni a, Pathianni tlai dar 5 leh nimin tlai dar 5 inkarah Vairengteah hripui vei mi pathum hmuh belh a ni bawk a; Mizorama hripui kai zawng zawng chu mi 792 an tling tawh. Hetih lai hian, nimin khan Covid-19 vei dam tawh mi pakhat chhuahtir a ni.

Nimina hripui vei dam tawh chhuahtir hi mipa niin, Covid care Centre (CCC), Pukpui, Lungleia enkawl a ni. Mizorama Covid-19 vei hmuh tawh mi 792 zinga mi 373 chhuahtir an ni tawh a, mi 420 an la chhuak lo. La chhuak lo zingah hripui vei tawh lo eng emaw zat an awm. Hripui vei tawhte hi mipa 659 leh hmeichhia 133 an ni. August 16-a Covid-19 vei hmuh chhuahte chu ZMC laboratory-a RT-PCR khawl hmanga swab sample 80 endik zinga mi pasarih bakah, Rapid Antigen Test hmanga mi 396 endik zinga Vairengtea hmuh chhuah mi pathum leh Serchhipa hmuh chhuah mi pahnih an ni. Lunglei Civil Hospital laboratory-ah erawh chuan mi 28 endik zingah hripui vei an awm lo.

August 16, Pathiannia ZMC-a hripui vei hmuh chhuah mi pasarihte chu Aizawl district mi paruk leh Lawngtlai district-a mi pakhat an ni a, harsatna nei (Covid-19 symptom lang) an awm lo. Lawngtlai district-a mi chu mipa kum 48, Maharashtra aṭanga lo haw, Lawng­tlai District Hospital-a enkawl mek a ni. Aizawl district-a hmuh chhuahte chu Mizoram chhunga mi dang aṭanga kai (positive contact) nia ngaih vek an ni thung. Chaltlang Lily Veng mi pathum mipa vek, kum 11, 17 leh 55-a upa te, Sawleng khuaa nurse hmeichhia kum 57 mi leh a tupa kum 10 mi te, Darlawn khuaa hmeichhia kum 36-a upate an ni. 

Rapid Antigen Test (RAT) hmanga Kolasib district (Vairengte)-a hripui vei hmuh chhuah mi pathum chu hnam dang driver/handyman vek an ni a, kum 20-38 inkar, Assam mi pahnih leh Bihar mi pakhat an ni. Serchhip district-a hmuh thar pahnih chu mipa ve ve, kum 23 leh 26 mi, tun hnaia Assam aṭanga lo let an ni a, Covid-19 symptom an nei lo. Pathianni tlai dar 5 leh nimin tlai dar 5 inkar khan Vairengte checkgate-ah RAT hmangin mi 528 endik a ni a, hripui vei mi pahnih, hnam dang driver/handyman ve ve hmuh chhuah belh a ni bawk. Vairengteah hian August 10 chawhnu lama swab test tih aṭangin nimin tlai dar 5 thleng khan Covid-19 vei mi 51 hmuh chhuah a ni tawh a, Mizo pakhat leh hnam dang 50 an ni.