KHAWTHLIR

AISSA president atan Mizo thlang

All India Sunday School Association (AISSA) kum thum dana inkhawmpui neih ṭhin, Triennial Conference vawi riatna chu November 27-28, 2023 chhung khan Inter-Church Service Association conference hall, Egmore, Chennai-ah neih a ni a; kum 2023-2027 chhunga AISSA office bearer turte thlan niin, president atan Rochamliana, Mizoram Presbyterian Kohhran thlan a ni. AISSA hi National Council of Churches in India hnuaia pêng pakhat a ni a, NCCI-a inziak lut kohhran zawng zawngte telna pawl a ni.

Heroin man

Assam Rifles leh Mizoram Police CID (Crime)-te chuan November 27, Thawhṭanni khan Bawngkawn South, Aizawlah heroin (no. 4) gram 94.680 an man a, a kawltu mi pahnih - Vanlalnghaka (32) s/o Lalbiaka leh Lalnunngila (37) s/o Lalnuntluanga, Bawngkawn Shalom Veng nia inchhál ve vete an man nghal. Heroin an man hi Rs 47,34,000 hû a ni.

Nupui vit hlum

November 27, Thawhṭanni zan dar 6 vel khan B Chhingpuii (60), Maubawk CH, Siaha district chu a pasal H Hnemsanga'n chemtein a vit hlum. Thu dawn danin, H Hnemsanga (51) hian an inhnial buai hnuah a nupui chu vawk chaw a chhum laiin hnung lam aṭangin chemtêin a vit a, ká chhawn lohin a thi. H Hnemsanga hi police kutah a inpe a, thubuai ziah luh a ni.

In sakpui

Baptist Church of Mizoram, Kikawn Kohhrana Tualchhung Relief & Development Committee chuan an member pahnih in sa mek, sak chhunzawmna nei lote chu November 27, Thawhṭanni khan an sakpui. BCM, Kikawn hian an member 10 chuang in an sakpui tawh a, mi ṭhahnemngaite'n bungrua an thawh khawm bakah kohhranin a lei ṭhin a ni.

Inhrilhfiah

Lunglei district election officer Ramdinliani hoin nimin khan DRDO conference hall-ah MLA inthlana candidate, election agent leh counting agent-te pualin vote chhiar chungchanga ruahmanna leh dan zawm ngaite inhrilh-fiahna hun hman a ni.