Rorelna dik atana thil tumte sawifiah
Rorelna Dik pawl hruaitute chuan nimin khan Aizawl Press Club-ah thuthar thehdarhtute an kâwm a; rorelna dik a awm theihna tura an pawl thil tum leh hmalak dan turte an sawifiah.
Rorelna Dik convener Lalrammawia chuan, Mizorama sorkar thar ding tur chu tute pawh ni se, kawng dik leh fel an zawh theih nan ṭawiawm a ṭul thu a sawi a, "Dik lo leh ṭha loah erawh dodal ṭheuh turin kan ngen che u. Keini pawhin chutianga ke pên a, theih ang tâwk tâwka sorkar hlawhtling neihna tura tha leh zung thawh turah kan inngai," a ti.
Tu party pawhin sorkarna siam se, an dinnaah dingin, ram rorelna an kalpuina kawngah mipui hnena an inzawrh laia an thutiamte an khawn khawm dawn thu sawiin Lalrammawia chuan, "Chutiang aṭang chuan sorkar thar bih zui a ni ang," a ti a; a huna sorkar thâ tichak tur leh kawng dik lo an zawh pawha dodal an tum thu a sawi.
Lalrammawia chuan, an phak tâwkah hlahthlemna mual bik nei loa an mihringpuite tan thawh zel an tum thu sawiin, "Vawiina Mizoram mipui rilru put hmang leh sûkthlêk tam tak en hian tuna sawi lâwk leh puan chhuah hi a ngai a, tihmâkmawhah kan dah. Mahni duhsak zawng leh ṭan lamte tana thil sawi pial leh sawi mâm thiam tak hnam kan nih chhoh zelna karah hian, ram tlûkchhiatna lam inzep tel hi kan hmuh fiah tel phal lohna a inphûm reng a ni," a ti.
Rorelna Dik hruaitute chuan, rem lo chung pawha mahni party sorkar leh puchuamte thlavâng hauh tum sa nih a ṭha lo nia sawiin, "Sorkar thil tih do tur ringawta rilru sen pawh a ṭha lo. Tharum thawh duhna hial kan ramah a thlen loh kan duh a, pumpelh dan kawng ṭha kan zawn tlàn a ngai," an ti a; Mizoramah ram ṭha zawk a awm theih nan finchhuah turin mipui an sáwm a ni.
RORELNA DIK THIL TUM ṬHENKHAT
• Hlemhlêt, hleih neih, dan zah lohna, thuneihna hman sual, duhàmna leh chutiangin a tihchhiat theih laka mihringpuite tana din leh ke pên.
• Mahni mimal leh pawl thuchah leh intiamna thusawite pawh zah zo lo, mihringpuite zahna leh duhsakna nei hauh loa an hlawhchhamna leh dinhmun sawi pial thiam an awm thei, chungte chu kan theih angin kan dodal ang.
• Mipuite'n kawng dik leh ṭha zawk, rilru pianken fel zawk kan neih theihna atan phak ang tawk tawka inzirtirna neia ke pen zel.
• Ram rorelna ṭha zawk neih zel theihna tura mipui zirtirna tur ṭha awm thei ang ang nia hriat lamah zirtir leh kaihruai tura ke pêna hmalak.