Cooperative society-te tan inzirna buatsaih

Mizoram State Cooperative Union (MSCU) hmalaknain nimin khan Khawzawl district-a cooperative society 29 hruaitute tan Khawzawl Electric Veng community hall-ah thil pawimawhte zirhona buatsaih a ni a, Khawzawl bawrhsap K Lalrohlua'n a hmanpui.

Zirhonaah hian cooperative society 29 aṭangin hruaitu 87 an tel a; thupui pahnih, 'Primary society nihphung leh inrelbawlna' tih leh leh 'Cooperative hruaitute mawhphurhna leh pawimawhna' tih hmangin cooperative society hruaitute thil pawimawh hrang hrang zirtir an ni.

K Lalrohlua chuan, Khawzawl district a pian hnuah cooperative society-te tana training hmasa ber neih a ni chu lawmawm a tih thu a sawi a, "Khawzawl district-a chengte hi Mizoramah a district anga taima berah ka ngai. Eizawnna kawngah lakhuihthei, tomato, sapthei, balhla, sawhthing, adt. te chu khaw hrang hrangah an thar chhuak nasa hle. Eizawnna péng hrang hrangte hian hma an sawn a, hma an lak zel theihna turin society dinin sorkarah inziah luh a pawimawh," a ti.

Khawzawl district chu district thar a nih avangin cooperative society-te chu hmun dang aṭangin Cooperation department-in a la hmui rih thu Khawzawl DC chuan a sawi bawk.