Kum 3 chhungin POCSO Act hnuaiah kumtlinglo khawih thubuai 320 ziak lut

Kum 2020-2022 chhung khan Mizoram Police chuan Protection of Children from of Sexual Offences (POCSO) Act hnuaiah kumtlinglo khuaikhem thubuai 320 an ziak lut a; zu khapna dan Mizoram Liquor (Prohibition and Control) Act (MLPC Act) hnuaiah thubuai an ziak lut bawk.

Mizoram Police Crime Report-in a tarlan danin, kum 2020-2022 chhung khan Mizoram chhung bik dan leh dan eng emaw bik (special/local law) hnuaiah thubuai 1,799 ziah luh a ni a; thubuai ziah luh zinga tam ber chu zu kaihhnawih (Prohibition/MLPC Act) hnuaia ziah luh niin, 789 a ni. Ruihhlo kaihhnawih dan, Narcotic Drugs and Psychotropic Substances Act, 1985 (NDPS Act) hnuaia thubuai 471 ziah luh a ni.

Kum thum chhunga thubuai ziah luhah, kum 2021 khan thubuai 712 ziah luh niin a tam ber. Prohibition/MLPC Act hnuaiah hian kum 2021 khan thubuai 417 leh POCSO Act hnuaiah thubuai 113 ziah luh a ni a; kum thum chhunga heng dan tlawhchhan kaihhnawiha thubuai ziah luh tam ber ve ve a ni.

Ruihhlo kaihhnawih thubuaiah chuan kum 2022 khan thubuai 247 ziah luh a ni a, kum thum chhunga a tam ber ṭum a ni. Kum 2022 hian POCSO Act hnuaia thubuai ziah luh 97 awmin, a tlem ber thung.