Covid-19 volunteer-te lawmman pek tum

August 16, Pathianni chawhnua Health & Family Welfare minister Dr R Lal­thangliana hoa sorkar hotute SAD Conference Hall-a ṭhu­khawm chuan Aizawlah total lockdown kalpui an rel bakah, Covid-19 donaa hlawh beisei loa thawk tura inpe (volunteer)-te lawmman (honorarium) siamsak leh, state pawn aṭanga rawn lut lirthei khalhtu leh puitu khung hran mekte chu an state-a thawn haw an rél.

Sorkar thuchhuah tarlan danin, inkhàrkhip chhungin contact tracing - primary leh secondary contact tracing-te huam zau taka buaipui a ni dawn a; a hmatáwnga thawktute a tam thei ang ber endik tum a nih bakah, mipui mimir aṭangin swab sample lain, random sampling test tih tum a ni.

Covid-19 donaa a hma­táwnga thawk, a bikin swab sample latu leh thawktu dangte chu Covid-19 an kai theihna a sàn bik avangin an inah haw mai loin, hmun khata an riahna turin Tourist Lodge, Chaltlanga in sak thar chu ruahman a ni a; Covid-19 donaa hlawh beisei loa thawk tura inpe (volunteer)-te chu lawmman (honorarium) siamsak an rél.

Health Minister hoa ṭhutkhawmah hian, Assam lam aṭanga Mizorama bungrua phur luttu lirthei khalhtu leh puitute zinga Covid-19 vei tih la finfiah loh, rinhlelh ni si mi 37 Thingdawla khung hran mekte chu a theih ang anga an state lama thawn hawn an rél a; bungraw phur lirthei khalhtu hnam dangte'n inkaihhruaina (SOP) ṭha taka an zawm theih nan SOP chu Hindi leh Bengali ṭawnga lehlin ni se, an ti.

Police leh Health department hotute chuan, tun hnaia Covid-19 vei ṭhenkhatte kai dan chu chiang taka finfiah a har thu an sawi a; contact tracing chungchanga task force-te'n an khua/vengah rang taka a ṭul anga an chêt theih nan an hmalak dante a hma thei ang bera inhriattir ṭhin ni se, an duh thu an tarlang.

Covid-19 Ordinance bawhchhe si loin, hripui kaite chenna hmun leh a chhehvelte chu task force-te'n rang takin sor­kar official-te hriattir ṭhin ni se an ti a, chu chuan awmze nei zawka task force-te'n ruahmanna an siam kawngah a pui thei turah an ngai a ni.

Meeting-ah hian, sipai (paramilitary force) zing­ah hripui vei an tam thu sawi lan a ni a, sipaite'n an zawm tur inkaih­hruaina sorkarin a siam tawh chu khauh taka kalpui chhunzawm zel a ṭul thu an sawi.

Ministry of Health & Family Welfare-in kum­in December thlaah Mizorama Covid-19 vei zat chu mi 5,000 vel ni tura a chhût (projection) chungchang sawi a ni a; chumi chungchanga Health department-in Contingency Plan a siam leh a kaihhnawih thilte chu Health Secretary-in a sawifiah.

New Zealand-in a kalpui mek, Covid-19 donaa hmalakna (risk assessment) chi khat, Co­vid-19 Alert Framework Level chu Mizoram mila duang turin Planning & Programme Implementation Secretary hnenah mawhphurhna pek a ni. Mipuiin hmun tam takah hmai tuam leh inhlata awm an la ngai pawimawh loh thu sawi a ni a, "Hemi chungchang hi khauh zawka kalpui turin hmalak ni se," an ti.