Covid-19 laka invenna turah VC-te'n Thingtlang tan dan hran siam an duh
All Mizoram Village Council Association (AMVCA) hruaitute chuan, thingtlang lama Covid-19 dona leh invênna kalpui meka rawtna an neih te, thingtlang lam economy chawikân dan tur leh MGNREGS ṭangkai lehzuala kalpui dan tura rawtna an neihte chief minister Zoramthanga hnenah nimin khan an thlen. Covid-19 hripui laka invênna turah thingtlang mite tan guideline hranpa siam an duh thu CM an hrilh.
AMVCA chuan, thingtlang mite tan Covid-19 hripui laka invên fimkhur theihna tur guideline hranpa sorkarin siam se an duh thu an thlen a; "Covid-19 vanga chî-âi emaw, uchuak taka hlauhna nunpui hi invênna ṭha ber a ni tawh loin kan hria. Thingtlang mite chuan nunphung rálmuang neih leh vat a, taima lehzuala hnathawh theih a, chumi hawia sorkarin programme mumal tak a neih kan duh," an ti.
MGNREGS material component sum chu mimal hna inpea party worker invulhna tur a ni lo tih sawiin AMVCA chuan, "Khaw tina VC/VEC leh mipui ráwn loa DRDA leh BDO office aṭanga material component hna kalpui ṭhin hi tihtàwp nghal kan phût. Hetianga kalpui hi MGNREG Act kalh a ni. MGNREGS sum hmanna reng reng chu mipui thlan VC/VEC-te'n mipui vantlang duh dan ráwn zela kalpui tur a ni," an ti a; MGNREGA-in a sawi anga felfai taka kalpui a nih loh chuan sorkar laipuiah emaw court-ah emaw an zualko tur thu an sawi.
AMVCA hruaitute hi an president Lalremsangi Fanai hoin Chief Minister an hmu a; CM Zoramthanga'n hun a lo pek avangin an lawm thu an sawi a ni.
AMVCA rawtnate
1. Mizoram chu agricultural-a thui tak innghat a nih avangin thingtlang lama agricultural & allied thlawhhma neih mekte statistical data chipchiar taka chhiarpui rang taka neih a ṭul. Data
aṭanga agricultural marketing system ṭha zawk kalpui vat a ṭul. Khaw tin data buatsaih nan rural local body fund emaw State Finance Commission fund aṭanga hman an rawt.
2. Thingtlang mite tana sum hnár, regular income awmchhun chu MGNREGS a nih avangin, MGNREGS-in a phal angin thingtlang mite kum khata ni 100 aia tam inhlawhna tur ruahmanna siam turin kan ngen.
3. MGNREGS material component sum hi mimal hna inpea party worker invulhna tur a ni lo. Khaw tina VC/VEC leh mipui ráwn loa DRDA leh BDO office aṭanga material component hna kalpui ṭhin tihtawp nghal kan phût. Hetianga kalpui hi MGNREG Act kalh a ni. MGNREGS pawisa hmanna reng reng chu mipui thlan VC/Village Employment Council-te'n mipui vantlang duh dan ráwn zela kalpui a ni tur a ni. MGNREGA-in a sawi anga felfai taka kalpui a nih loh chuan AMVCA-in central sorkar emaw court-ah kan zualko ang.
4. Thingtlang mite tan Covid-19 hripui laka invên fimkhur theihna tur guideline hran sorkarin siam se an duh.
5. Covid-19 vanga chi-ai emaw, uchuak taka hlauhna nunpui chu invênna ṭha ber ni tawh loin an hria. Thingtlang mite'n taima lehzuala hna an thawh theih nan sorkarin programme mumal tak a neih an duh.
6. February-March chhungin hripui vanga ṭâm thleng turah thingtlang lam inbuatsaih a, thlawhhma la zau a, chuktuah huan thlenga hma la turin an infuih. Covid-19 lên zelna leh ṭàm thleng thei tura invenna kawng hrang hrangah VC-te thu ngai pawimawh turin sorkar an ngen.
7. LAD-in Rural Administration Reformation chungchanga hmalakna an neih mek chu AMVCA nen enho thuai an rawt.