Beisei hunah rél a thleng lo

Karnataka, Madhya Pradesh leh Gujarat aṭanga Mizo tangkhang rawn hawte chuanna rél chu beisei hunah a rawn thleng thei lo. Rawn hawte hmuak tur hian official-te chu nimin zing aṭang khan Bairabi rel chawlhhmunah an awm tawh.

Beisei dan chuan, tangkhangte Gujarat leh Madhya Pradesh (rél pakhata chuang ho) aṭanga rawn hawte chu Ningani zan zanlai vela rawn thleng tur an ni a, Karnataka (Bangalore) aṭanga rawn hawte chu zing dar 8 vela rawn thleng tur an ni thung. Lumding, Assam-ah leimin avang leh chhan dang avangin beisei hunah rel hian Bairabi a thleng thei ta lo a ni.

Nimin tlai lam khan Karnataka aṭanga rawn hawte chu Lumding-ah an táng a, Gujarat aṭanga rawn hawte chuan Guwahati aṭangin Lumding an pan thung a, nizan zanlai velah Bairabi an thleng thei tura beisei a ni.

Rél hmanga rawn haw turte hi report ang chuan mi 1,975 an ni a, Bairabi aṭanga quarantine centre thleng phurhna atan Madhya Pradesh leh Gujarat aṭanga lo haw tur tan bus 32 leh Karnataka aṭanga lo haw tur tan bus 81 Mizoram sorkarin a ruahman.