ZPM hruaitu thar ruat chu Val Upa Council kutah - Duhoma

Zo Peoples' Movement Legislature Party (ZLP) leader Lalduhoma chuan, ZPM party hruaitu lailâwkte hun zo tawh mah se, hripui léng karah hruaitu thar thlan theih a nih loh avangin Val Upa Council (VUC) kutah a awm a, VUC-in hruaitu thar a ruatte chu pawm vek turin an party mite a ngen a; inthlan lehah sorkar siam thei tura ṭan la turin party mite a chah.

Thuthar thehdarhtu ṭhenkhatin an kawmnaah Lalduhoma chuan, ZPM VUC-in kum khat chhung atana an hotu lailâwk a ruatte hun chu August 5, 2020 khan a tawp tih a sawi a, "Hemi denchhen hian party ṭhenkhat-in ZPM chu inthlang tur leh keh chhe hial tur angin an sawi a, kei hi president chuh tur leh lamṭang pawh siam angin thu an thehdarh a, hei hi thu dik lo a ni," a ti.

Lalduhoma chuan, tun maiah chuan hruaitu thar thlan theih a ni dawn lo tih sawiin, "Inthlang tur chuan General Assembly koh a ngai a, tunlai hri léng karah hei hi tih theih a ni lo," a ti a; General Assembly neih hun tur pawh sawi lâwk theih a ni lo tih a sawi.

ZPM party kal zel dan tura thuneitu sang ber chu Executive Committee a ni tih sawiin Duhoma chuan, "Executive Committee ṭhukhawm tur pawhin sorkarin mi 50 aia tam awm khawm a phal loh avangin ṭhutkhawm theih a ni lo. Hei vang hian kan hotute pawh dinhmun lài takah an ding a, hei vang hian ZPM Political Affairs Committee chuan an kal zel dan tur chu VUC rêl turin a dah a ni," a ti.

Lalduhoma chuan, VUC thu­tlukna chu thu tàwp a nih dawn avangin an mawhphurhna a sáng tih sawiin, Mizoram leh ZPM tana kawng ṭha ber an dap chhuah theih nan ṭawngṭaipui an ngai tih a sawi a, "Val Upate thutlukna ang ang chu kan ṭawngṭai chhannaah zaa zain ka pawm dawn a ni," a ti a; ZPM mite chu inlungrual taka an boruak ṭha chhawm nung zel tur leh inthlan leha sorkar siam thei ngei tura ṭan la zel turin a ngen. 

ZLP leader Lalduh­oma chuan, ZPM chu a pian hma aṭangin mi ṭhenkhatin an helh a, an urlâwk nasa tih sawiin, "ZPM a pian hnuah chi hrang hrangin tihṭhaih a ni. An inpumkhat thei chuang lo ang, inchhùng khawm pawh ni se a hmingah an buai ang, flag-ah an buai ang, symbol-ah an buai ang, hruai­tuah an buai ang tihtein chotuah tumin nasa taka an bei chungin kan buai lo. Harsatna awm thei zawng zawng chu Pathian zarah kan paltlang vek a, tunah chuan eptu pawl lian ber leh ṭhang duang ber kan ni ta a ni," a ti.

VC leh LC inthlan tura khaw ṭhenkhata an party-in thawhpui a neih chungchang zawhna chhangin Duhoma chuan, unit level-a an lo insiam remna a ni a, headquarters leh block hriatpuia tih a nih loh thu a sawi a, "Khaw ṭhenkhatah Congress nen an thawhho avang hian Congress nen inzawmna an nei tihna a ni lo," a ti a; VC thlan turah Cong­ress leh MNF pawh khaw pahnihah an thawk dûn tih sawiin, chumi avang chuan Congress leh MNF chu ram pumah thawkhoa puh an ni chuang lo tih a sawi.

VC leh LC-a rorel lai páwl thlan a ṭhat bik leh ṭhat bik loh chungchangah Lalduhoma chuan, VC-te chanvo tur budget-ah a hranpaa dah a nih tawh avangin ruling VC neih ngei ṭul anga inzirtirna awm ṭhin chu a bo tawh tih a sawi a, "Khawtlang hmasawnna hna thawh kawngah ruling VC/LC-te chu an ti dik lo deuh a nih pawhin chhantu an neih avangin tih an har a, eptu VC neih ṭhat zawkna a tam tawhah ngaih theih a ni," a ti.

Lalduhoma sawi dan­in, tun hma chuan VC-te'n budget-ah a hranin sum an nei lo a, Constitution siamṭhat vawi 73-naah VC-te chanvo tur budget-a awm turin rua­hmanna siam niin, chu chu kumin aṭangin a taka kenkawh ṭan a ni. 15th Finance Commission-in khaw tina VC-te chu an sum insem tur cheng vbc. 93 a ruahmansak a, an chan tur ṭheuh chu ruling VC nih vangin a pung dawn lo a, eptu VC nih vangin chan tur a kiam dawn lo a ni.