Kristian Ni Serh Humhalhna Punkhawm NGO-te'n vawiinah an huaihawt dawn

Mizorama kohhran leh pawl hrang hrangin Mizoram Assembly inthlanpuia vote tlate chhiar ni (December 3, 2023) sawn tura an ngennaah Election Commission of India (ECI) aṭangin thu lawmawm a la awm loh avangin NGO Coordination Committee chuan vawiin hian 'Kristian Ni Serh Humhalhna Punkhawm' an huaihawt dawn.

Vote chhiar ni sawn leh sawn loh chungchangah hian Mizoram Election department hotute chuan Vanglaini palai zawhna chhángin, ECI aṭanga thu dawn an la neih loh thu an sawi.

Election department hotute chuan, nimin kha Telengana-ah inthlanpui buatsaih a nih avangin ECI lamin eng mah an ngaihtuah hman an rin loh thu an sawi a, "Naktuk (Zirtawpni)-ah an ngaihtuah dawn tihna erawh a ni lo. An kaltlangpui dawn nge dawn lo keini lam chuan eng mah kan hre lo," an ti.

Election department hotute sawi danin, tun dinhmunah chuan December 3, 2023-a vote chhiar turin an inbuatsaih zel a, inbuatsaihna pawh a zo thawkhat tawh a ni.

Hetih lai hian, NGO Coor­dination Committee hruaitute chu nimin khan Central YMA Committee Room-ah an ṭhukhawm a; vawiin chawhma dar 11 aṭanga chawhnu dar 1 thleng Raj Bhavan hmar lam gate bulah 'Kristian Ni Serh Humhalhna Punkhawm' huaihawt an rél.

NGOCC chuan, "9th Mizoram Legislative Assembly inthlanpui vote chhiar hun atana ECI-in December 3, 2023 (Pathianni) a ruat chu nasa tak leh theih ang tawka all political party te, Mizo Kohhran Hruaitute Committee (MKHC) leh All NGO Coordination Committee (NGOCC)-te'n dodala hma an lak hnuah leh, ECI hotute pawh Delhi-a an zu hmuh hnuah thu lawmawm dawn leh hriattir a la awm loh avangin December 1, 2023 (Zirtawpni) chawhma dar 11 aṭanga chawhnu lam dar 1 thleng Raj Bhavan hmar lam gate bulah Kristian Ni Serh Humhalhna Punkhawm buatsaih ni se," tiin an tarlang.

NGOCC chuan, Kristian Ni Serh Humhalhna Punkhawm chu Mizorama district hrang hrangah lo huaihawt ve turin district-a NGOCC hruaitute an ngen a; Kristian sakhaw ni serh humhalh turin Mizo Kristian tawh phawt chu tel vek turin an sáwm a ni.

Tarlan tawh ṭhin angin, vote thlak hun sawn tur hian kohhran, tlawmngai pawl leh political party chuan ECI-ah ngenna an thlen ṭhin a, mahse ECI chuan sawn a nih dawn loh thu Mizoram CEO an hrilh.

NGOCC hruaitute chu Delhi-ah kalin, November 28 khan ECI hotute hmuin vote chhiar ni sawn turin an ngen leh a ni. ECI hotute chuan an lo sawikhawm tur thuin chhang mah se, engmah thudawn an nei chuang lo.