MKHC-in December 3, 2023-ah pungkhawm lo turin mi tin an ngen

Mizoram Kohhran Hruaitute Committee (MKHC) chuan, Mizoram inthlanpui vote chhiar hun chu December 3, 2023, Pathianni-ah tihtlang a nih chuan Pathian biak inkhawm bak chu hmun dangah mipui punkhawmna buatsaih lo turin Mizoram mipui leh political party-te an ngen.

MKHC hian nimin khan thuchhuah siamin, "Vote chhiar hun sawn a nih loh chuan December 3, 2023, Pathianni-ah hian Pathian biak inkhawm bâk chu khawi hmunah mah mipui punkhawmna buatsaih lo turin Mizoram mipui zawng zawng kan ngen a ni," an ti.

MKHC chuan, "December 3, 2023 hi Pathianni a nih avangin party office-te nilénga hawng lo turin political party zawng zawngte kan ngen. Kan hnam leh kan sakhua a lo him a, sakhaw zalenna kan neih zel theih nan Mizoram mipui zawng zawngte ṭangrual sauh sauh turin tih tak zetin kan inngen a ni," tiin mipui an ngen.

Mizoram MLA inthlanpui vote chhiar ni sawn tur leh Pathianni leh Inrinni ni lo ruat tura MKHC, NGO hrang hrangte leh political party zawng zawngte'n Election Commission of India hnena ngenna an thlen tawhin November 30 thlenga awmzia a la nei lo chu pawi an tih thu MKHC chuan an tarlang.

MKHC chuan, NGO Coordination Committee hotute Delhi-ah kalin, November 28, 2023-ah khan Chief Election Commissioner hmuin, hmaichhanah ngei vote chhiar hun sawn tura ngenna an thlen nawn leh tih an tarlang a, "Chuti chung chuan vawiin thlenga ECI aṭanga chhanna a la awm lo hi pawi kan ti tak zet a ni," an ti bawk.